VOV4.K’ho- Càr Kon Tum tŭ do geh rlau 6 rbô 200 nă cau kuet kơltê mờ uă ngan tàm khà ală cau ờ bơtuah do neh sơrlèt gan bơta kal ke, pin dờn brồ guh lơh tờm rài kis he dê.

Bi Nguyễn Thị Kim Trúc, 49 sơnam pà git, 23 nam lài mờ 2 đah jơng ờ gơtùi lòt, bi bơh ƀòn tờm lòt tus càr Kon Tum jòi broă nàng lơh sa. Sơr lèt gan uă broă lơh bơh tàñ jàl, che ñoal, tàñ àu mrềt... jòi priă nàng kis pah ngai, hơ̆ sồng tềm pềr geh hời rơ hời pờ geh dùl anih tac phan ngui sa. Ờ mìng brồ guh lơh tờm rài kis he dê, bi Nguyễn Thị Kim Trúc gam lơh wil tơl kơnòl cau kòn, gròi sền wil tơl bè phan bơna, nùs nhơm ai mè bèp he dê in tŭ ồng mò gam kis mờ oh klau tŭ do gơtìp kòp jê tàm ƀòn tờm. Ờ mìng bè hơ̆ lơm ờ, bi gam dong 2 nă cau tàm ƀòn lơgar geh broă lơh tai. Yal bè broă lơh mờ rài kis he dê, bi Trúc đơs bè do: “Să tờm añ dê là pal kis niam, să tờm he pal git sơnơng is, pal git kis lơbơn niam. Tac phan pal dòn song nàng làng bol, mơi wa dong kờl, sền gròi tus he, blơi phan he dê. Ai dilah he kis ờ niam, kis iơh, tac phan kas tai den làng bol ờ sơnđàc, ờ kờñ he. Nùs nhơm niam pal ơn lài ngan. Gơtìp kuet kơltê să jan mơya pal geh nùs nhơm niam”.

Bi Nguyễn Thị Kim Trúc mờ hìu tac phan ngui sa he dê

Tam pà bal mờ bơta kal ke bơh cau tờm anih tac phan dê, nac quèng ndrờm mut song tơn tàm anih tac phan ai is phan he kờñ blơi. Mò Nguyễn Thị Lan ơm tàm mpồl 3, sơnah ƀòn Duy Tân, dùl nă cau blơi phan mờng quèng, lời uă nùs nhơm sền ngềr tŭ đơs tus cau ùr tờm anih tac phan ngui sa: “Ơi, bi Trúc hơ̆ làh. Tac phan den sơrmah sơrmài ngan, chờ hờp tai. Mờ đơs ngan là tac ờ kas den tàng geh gal cau blơi. Bi Trúc hơ̆ tryăng tryồng ngan. Đơs bal là cau gơtìp kal ke mơya tryăng tryồng, ơm sàng goh, den tàng cau kung kờñ, den tàng khai geh gal ngan cau blơi phan”.

Tơl nă cau geh dùl rài kis krơi is, tơl nă cau cèng tàm să jan dùl bơta ờ niam krơi is, mơya uă ngan tàm khà rlau 6 rbô 200 nă kuet kơlte tàm càr Kon Tum neh jòi bàn bơta chờ hờp ai să tờm he in. Geh dùl bơta ndrờm bal ƀuơn ngan sền gŏ tŭ ơm rềp, boh bơr mờ khi, hơ̆ là nùs nhơm brồ guh pràn ngan, bơta pin dờn tàm să tờm he dê. Bi Phạm Thị Hồng Hương, 53  sơnam, ơm tàm thôn 6, xã Đoàn Kết, ƀòn dờng Kon Tum gơtìp kuet kơltê tềng jơng bơh tŭ gam dềt tŭ do neh geh tơl sau ùr, sau klau mơya kung gam tryăng tryồng ngan lơh broă: “Jơh tơl broă añ ờ jai lơh kung pơn đơl lơh đau. Àng drim gơm mbar nàng tac kềng rềp hìu bơsram. Rê den tơ wès nhơt siam kơnrồ, siam sur sa. Hơ̆ sồng geh tŭ tơngai ru den lòt lơh nhơt tàm Mpồl Brồ guh is. Mho rê kung mai, lơh niam wơl phan soh. Đơs bal là lơh broă geh priă jền hìu bơnhă in nàng kơlôi rơcang kòn in, bơklau añ dê tŭ do kung gơtìp kòp jê. Kơp kờñ añ dê là ală cau kuet kơlte pơn đơl pràn, lơh ngan kis chờ hờp, pin dờn, ờ gŏ di sơ êt sơ ềl tàm să. He pin dờn lơh gơtùi broă lơi den he lơh nàng kis gơ rờm bal mờ mpồl bơtiàn”.

Bi Phạm Thị Hồng Hương mờ dùl tàm uă broă lơh pah ngai

Pa do, Mpồl sền gàr gơnoar kơnòm dềt mờ Sền gàr, dong kờl cau kuet kơlte càr Kon Tum bơyai lơh Pơrjum jờng rơ cau kuet kơlte geh pơn rơ jak. Mò Nguyễn Thị Ánh, Củ tịc Mpồl pà git: “Pơrjum dơ̆ do bol hi geh 100 nă cau ala mat là cau kuet kơlte tàm jơh ală kơnhoàl, ƀòn dờng tus bal. Ală cau pơn rơ jak tàm do digơlan là geh mpồl dong kờl, digơlan là ờ hềt geh mpồl dong kờl mơya khi neh geh ală broă lơh geh kuơ nàng brồ guh lik klàs rƀah, brồ guh tàm rài kis mờ dong kờl ală cau kuet kơlte rƀah rlau nàng khin in brồ guh. Pơrjum geh bơta gơ rề dờng ngan. Ală cau geh rê tus bal pơrjum do rê wơl hờ ƀòn lơgar he dê lơh gơ rề ală krơh cau niam broă niam nàng pơn jat tai geh ală broă lơh geh kuơ dong ală cau gùt dar nàng khin in bal mờ gơp brồ guh”.

Bơh bồ nam tus tŭ do, mìng is Mpồl sền gàr gơnoar kơnòm dềt mờ sền gàr, dong kờl cau kuet kơlte bơh càr dê neh jàu pà 4 nơm hìu nùs nhơm kờp priă 125 tơlak đông; dong kờl 10 nơm kơnrồ me ai hìu bơnhă cau kuet kơlte geh rài kis kal ke in mờ gam rơcang jàu pà 200 nơm rơndeh chồl mờ tê ai cau kuet kơlte in.

Cau mblàng K’Duẩn