VOV4.K’ho - Tỉñ ủy Kon Tum neh tơlik kơrnoăt lơh glài tơn jơh, jơh ală gơnoar broă tàm Đảng gơwèt mờ ồng Đặng Thanh Nam, Phó Ƀí thư Huyện ủy, Củ tịc UɃÑZ kơnhoàl Kon Plông.

Rơndăp broă lơh hìu kwơ̆ hờ đah tô tiah tàm gùl kơnhoàl Kon Plông tìs mờ ală kơrnoăt tàm adăt boh lam bè bơcri priă

Geh git gơtìp Tỉñ ủy Kon Tum pal lơh glài ồng Đặng Thanh Nam là tài gơrềng tus mờ ală dơ̆ tìs tàm gah atbồ ù tiah mờ bơcri priă bơ̆t bơtàu. Geh pơnrơ ngan là broă ồng Đặng Thanh Nam đơng lam lơh Broă rơndăp lơh tàm bă ù lơh hìu Kwơ̆ hờ đah tô tiah tàm gùl kơnhoàl Kon Plông mờ bă ù ơnàng rơlao 21 lồ tŭ ờ hềt geh tam gơl broă kờñ ngui ù, ờ hềt geh kấp ai gơnoar kĭ tìs mờ ală kơrnoăt tàm adăt boh lam bè bơcri priă dà lơgar. Tỉñ ủy Kon Tum đơs, tìs bơh ồng Đặng Thanh Nam lơh gơtìp hoàc huơr uă, lơh ờ niam nùs nhơm tàm kwang bàng, cau geh đảng bal mờ làng bol; lơh gơmù nùs nhơm pin dờn tàm kấp ủy, gơnoar atbồ kơnhoàl bal mờ să tờm ồng Đặng Thanh Nam dê.

Cau mblàng Ndong Brawl