VOV4.K’ho - Tàm càr Kon Tum tơngai pa do kòp Kovid-19 neh lơh uă cau lơh broă kòn cau pal ơm lơh broă, roh broă lơh mờ kal ke nàng jòi geh broă lơh. Gơdờp bal mờ kòp gơtờp, ală anih lơh broă geh gơnoar tàm càr Kon Tum gam chồl pràn broă yal, pơlam dong kờl cau lơh broă jòi geh broă lơh, ring niam rài kis mờ lơh gơs rơndăp broă geh ai tàm nam do, là ai broă lơh 6 rơbô 200 nă cau lơh broă mìng là cau lơh broă kòn cau in.

Geh bơyai lơh tàm 1 ngai lồi nhai 2 pa do, dơ̆ pơlam, yal broă lơh, bơsram broă lơh nam 2022 geh Anih tờm drơng ala broă lơh càr Kon Tum đơng lam tàm xã Sa Nghĩa, kơnhoàl Sa Thầy hòi jà mờr 100 nă cau lơh broă tàm kơnhoàl do tus bal.

                                                Yal broă lơh bơdìh càr cau lơh broă in

Ồng A Tran, kis tàm ƀòn Đăk Tân pà git, tŭ kòp Kovid-19 gơtờp pràn, kòn tơnhoa ồng dê lơh kông ñân tàm càr Bình Dương ơm ờ lơh broă rê hờ ƀòn lơgar. Tŭ do kòn dơ̆ 2 kung neh tơl 18 sơnam, ồng kờñ jòi geh broă lơh kòn in: “Hìu añ tam rơlao 1 rơbô tờm kơphe. 7 nă kòn kung kal ke ngan sơl. Kơ̆p kờñ là ală kòn geh lòt lơh broă nàng geh tai priă. Kơ̆p kờñ là mpồl lơh sa kă bro dong kờl ai hìu ơm, rơndeh lòt. Dơ̆ bàr tai là priă nhai uă đao”.

Tus mờ dơ̆ pơlam, lŏ Y Hương kung bè ală cau lơh broă ndai tàm xã Sa Nghĩa sơl ndrờm kơ̆p kờñ geh jòi broă lơh di pal, geh priă ring niam nàng tơnguh rài kis: “Hìu den lơh kơphe geh 3 sào, tŭ do gam kal ke ngan. Kơnờm mờ Anih tờm drơng ala broă lơh yal ai broă lơh ring niam. Di lah geh den lơh broă tàm càr, lơh broă tàm tiah ngài den kal ke ngan”.

                                                  Bơto pơlam broă lơh cau kòn cau in

Tơngai pa do, uă mpồl lơh sa kă bro neh pơyoa sră nggal tus sở Lao động, Thương binh mờ Xã hội càr Kon Tum kờñ dong kờl rơwah cau lơh broă mờ kờp jơh tus rơlao 10 rơbô nă cau lơh broă. Bơh tàm càr tơn, broă kờñ rơwah cau lơh broă bơh ală mpồl lơh sa kă bro kung gơguh uă. Mơya tài geh uă cau lơh broă gam kờñ cau lơh broă kòn cau den tàng pal rơwah ală mpồl lơh sa kă bro geh broă lơh niam, di pal nàng pơlam, yal mờ bơyai lơh bơto bơtơl, geh jơnau git wă ai cau lơh broă in. Mò Nguyễn Thị Nga, Kwang atbồ Anih tờm drơng ala broă lơh càr Kon Tum đơs: “Lài mờ tŭ ai cau lơh broă lòt lơh broă tàm ală càr den pal pơlam, bơto bơtơl jơnau git wă, bơta ngăc ngar cau lơh broă in, tàm hơ̆ uă ngan là bơta ngăc ngar tàm broă boh bơr tàm anih lơh broă. Boh bơr tŭ ơm kis bal. Lơh jăt broă lơh sa mờ măi mŏk. Yal nàng làng bol in git be broă lơh, gơnoar kwơ, kơnòl tŭ lòt lơh broă tàm ală mpồl lơh sa kă bro. Kwơ màng là lơh broă mờ ală anih tờm drơng ala broă lơh càr tờm kung bè ală mpồl lơh sa kă bro nàng ai anih ơm mờ sa làng bol in geh niam”.

Bal mờ broă dong kờl cau lơh broă jòi geh broă lơh, tŭ do ală anih lơh broă geh gơnoar tàm càr Kon Tum kung gam geh sùm ờ uă broă dong kờl, lam sồr cau lơh broă bè: dong kờl priă xét nghiệm kòp Kovid-19; dong kờl priă đì rơndeh, priă sào sa jăt gùng lòt mờ ai cau lam gùng jun cau lơh broă tus tàm anih lơh broă. Tàm tơngai cau lơh broă, lơh broă tàm ală anih lơh broă, mpồl lơh sa kă bro bơdìh càr, anih lơh broă geh gơnoar càr Kon Tum kung geh bơto sồr broă pơgồp bal mờ cau lơh broă nàng git bè broă lơh, mờ dong kờl di tŭ, tŭ cau lơh broă gơtìp kòp tê jê să ha là geh broă kwơ màng tàm hìu nhă.

Cau cih Khoa Điềm- Cau mblàng Ndong Brawl