Tàm dơ̆ lam lơh dong kờl làng bol gơtìp hoàc huơr tài càl rbut dờng sồ 3 lơh gơbàn geh Tỉñ ủy, Mpồl duh broă làng bol, Anih duh broă làng bol, Anih duh broă mặt trận dà lơgar Việt Nam càr Kon Tum bơyai lơh tàm mho ngai 12/9 neh geh 203 anih lơh broă, mpồl lơh broă, mpồl lơh sa kă bro mờ cau dồ nă să tàm càr dong kờl tơn rlau 425 tơlak đông. Bal mờ hơ̆, geh 23 anih lơh broă, mpồl lơh broă, mpồl lơh sa kă bro cih tàm sră dong kờl khà priă rlau 2 tơmàn 65 tơlak đông. Tàm hơ̆ geh uă mpồl lơh broă, ală tiah dong kờl mờ khà priă uă ngan bè kwang bàng, làng bol ƀòn dờng Kon Tum dong kờl 400 tơlak đông, kơnhoàl Đăk Tô dong kờl 300 tơlak đông. Mờ nùs nhơm tàm kờñ gơboh bal kòn bơnus, tam pà bal roh rui, kal ke, kwang bàng mờ làng bol càr Kon Tum kung gam pơn jat tai geh ală broă lơh niam tă pơgồp dong làng bol ală càr, ƀòn dờng tiah đah tô gơtìp hoàc huơr tài càl rbut dờng sồ 3 lơh gơbàn mờ priă kung bè ală phan ngui sa pal geh.