Tàm 3 dơ̆ bŭ dà lơh 6 nă cau chơt geh 2 dơ̆ bŭ dà gơlik geh tàm ƀòn dờng Kon Tum lơh 3 nă oh dềt chơt mờ 1 dơ̆ bŭ dà gơlik geh tàm xã Hơ Moong, kơnhoàl Sa Thầy lơh 1 nă cau dờng mờ 2 nă oh dềt chơt. Dơ̆ bŭ dà pa ngan rlau jơh gơlik geh tàm ngai 15/8 tàm thôn 5, xã Đoàn Kết, ƀòn dờng Kon Tum lơh 2 nă oh dềt chơt.

Tàm tơngai pa yal, pe nă sau geh: Y La (17 sơnam); Y Luyẽn (16 sơnam) mờ Y Lơi (14 sơnam) ndrờm ơm tàm thôn Kon Rờ Bàng 1, xã Vinh Quang, ƀòn dờng Kon Tum lòt dus kòi nàng tam tàm ƀlàng sre thôn 5, xã Đoàn Kết. Tŭ 3 nă sau ràu kòi tam tàm tơnau dà ƀồm kơphe bơh hìu bơnhă ồng Đặng Châu Phong dê den 2 nă sau là Y La mờ Y Luyẽn ntiar jơng gơ dùh tàm tơnau dà, chơt bŭ dà. Bal mờ hòi jà mpồl cau lòt jòi, dong kờl rềs àr, gơnoar atbồ, mpồl cau tàm ƀòn tiah gơlik geh ală dơ̆ bŭ dà kung bơyai lơh lùp còp, pơn dờm pơnđiang hìu bơnhă geh cau tờm gơtìp bŭ dà. Mờ kung sơlơ tơnguh tai broă lơh mblàng yal, tơngkah lài bè jơnau pơhìn bŭ dà gơlik geh tàm ƀòn lơgar.