VOV4.K’ho- Jơh gùt càr Kon Tum tŭ do geh 87 anih kă bro xăng zờu pah nam tăc tàm drà kă bro pơgap 120 rơbô khối. Tŭ do, bulah drà kă bro xăng zờu, geh bơta gơlik geh ờ niam mơya ală anih kă bro xăng zờu tàm càr Kon Tum kung gam gàr niam jơnau kờñ blơi. Là Mpồl lơh sa kă bro Dà lơgar geh pơgap 65% ală bơnah phan xăng zờu càr dê, ala mat anih kă bro xăng zờu Kon Tum đơs nền, Petrolimex Kon Tum geh gàr tơl drà tăc xăng zờu di pal mờ jơnau kờñ ngui xăng zờu tàm ală nhai lồi nam.

Dùl anih tăc xang zờu bơh Petrolimex Kon Tum

Ồng Nguyễn Văn Thành, Phó Kwang atbồ anih kă bro xăng zờu Kon Tum pà gĭt, kờp jơh bơta pràn ơn prap bơh ală anih kă bro xăng zờu gơwèt Petrolimex Kon Tum dê geh pơgap 2 rơbô 300 khối mờ geh sùm bơta pràn ơn prap kờp bal 80%. Mờ khà ơn prap do, tàm ală bơta gơlik geh nisơna, Petrolimex Kon Tum geh gàr niam jơnau kờñ ngui xăng zờu ai làng bol in bơh 15 tus 20 ngai. Bal mờ hơ̆, mpồl lơh broă kung rcang lơh broă mờ ală drà tăc xăng zờu, ờ gŏ lời bơta jơh xăng zờu tàm ală nhai lồi nam.

VOV Tây Nguyên/Cau mblàng K’Hạnh