VOV4.K’ho- Tơnơ̆ ală kàl ơm rơbô bơkang uă ngan là ơm tàm hìu nàng rcang sơndră kòp Kovid-19, kàl rơlô bơkang nam do geh ală kơnòm pa tàu, kơnòm dềt tàm càr Kon Tum neh geh tus bal ală broă lơh mờ he kờñ. Sền gĭt jơnau kờñ do, ală Anih tờm, Hìu niam chài, mpồl cau, cau dùl nă să is tàm Kon Tum neh lơh geh uă tiah nhơl ñŏ nàng kơnòm dềt in geh tai bơta sac rơwah bơtàu tơnguh bơta jak chài bơh he dê.

 Ờ sền gròi tus trồ tơngai duh trơ ồl ngan bơh kàl rơlô bơkang dê, mpồl pơgap 30 nă kơnòm bơsram bơh ơdŭ 6 tus ơdŭ 8, Hìu bơsram kấp bàr Nguyễn Sinh Sắc  ƀòn dờng Kon Tum kờñ ngan pơlam tàp bơta chài broă lơh Đội dê. 

Ală kơnòm dềt bơsram tàp tur sơgơr, ơdŭ bơta bơta chài lơh broă Đội

Oh Lã Đình Hoà An, kơnòm bơsram ờdŭ 6Y, pà gĭt, oh gŏ he geh bơta chài den cih mat tus bal bơsram tàp broă lơh Đội bơh Anih tờm Niam chài Tàp pràn să jan Ơruh pơnu, kơnòm pa tàu mờ kơnòm dèt càr Kon Tum dê pờ tam tơngai kàl rơlô bơkang. Gơwèt mờ oh Lã Đình Hoà An, kàl rơlô bơkang do geh uă ngan bơta chờ hờp mờ kwơ màng ngan.

Kàl rơlô bơkang do bol oh geh tơrgùm bal wơl bal mờ gơ̆p nàng tus bal ală broă lơh geh kwơ ngan den bol oh gơlơh chờ hờp ngan tài bơh tơnơ̆ 2 nam kòp Kovid-19 den gơtùi bal mờ gơ̆p lơh broă wơl tai. Geh tìp wơl uă ngan gơ̆p bơyô, cribơyai, tìp mat bal mờ kah wơl ală jơnau kir sơnrai mờ he neh lời tĕ tàm ală tơngai kòp Kovid-19. Di tơngai kàl rlô bơkang do bơdìh mờ ơdŭ do den oh kung geh tus bal bàr pe broă lơh bè là tàp võ, re dà kung bè bơsram tàp ală bơta chài wac sềr rùp.

Kòp Kovid-19 geh gròi sền, kàl rơlô bơkang do lơh tềl bơta lơh broă wơl bơh uă anih nhơl ñŏ lời ai kơnòm dềt mờ tơrgùm uă ngan rlau jơh là tàm ƀòn dờng Kon Tum. Bal mờ ală ơdŭ bơto bơtê bơta chài tàm ală Anih tờm, Hìu Niam chài, ală mè bèp kung gơtùi sac rơ wah ală ơdŭ bơto bơtê bơta chài bơh mpồl cau, cau dùl nă să is pờ nàng oh kòn he dê bơtàu tơnguh bơta chài să tờm dê.

Ơdŭ bơto re dà rcang sơndră bŭ dà bơh Anih tờm Niam chài Tàp pràn să jan Ơruh pơnu, Kơnòm pa tàu mờ Kơnòm dềt càr Kon Tum dê

Bi Đặng Linh Ngọc, mè oh Nguyễn Đặng Gia Hân, 6 sơnam, hìu ơm tàm Tổ 1, sơnah bòn Duy Tân ai oh kòn tus bal tàm ơdŭ bơto bơta chài tam ya tàm gùng Hoàng Thị Loan, pà gĭt: Gơlơh gŏ sau ơm tàm hìu kung geh bơta chài bè ală môn bè là tam ya, đơs crih mờ wac sềr rùp. Ală sau neh jơh tơngai bơsram tàm hìu bơsram, bơdìh mờ tơngai ơm gời tàm hìu den kung kờñ ală sau tus dùl Anih tờm mơkung là tiah nhơl ñŏ. Dơ̆ 2 là ală sau gơtùi nhơl ñŏ, tàp pràn să jan geh là niam rlau mờ broă ală sau ơm tàm hìu gời. Kung kơno là ală mè bèp ndai yal bè anih tờm do den là kờñ sau tus bal nàng bơtàu tơnguh bơta jak chài să tờm dê. Tơngai rơlô bơkang nam do, bal mờ ală ơdŭ bơto bơta jak chài să tờm, khoá bơsram bơta chài, sàl rơlô bơkang neh mờng kwèng ngan bè: wac sềr rùp, đờng Organ, võ thuật, bơsram tàm ling klàng... ală kơnòm dềt tàm Kon Tum gam geh ală bơta sac rơwah pa ngan, bè: Broă lơh sền gĭt trồ tiah brê bơnơm geh is; Hìu ơm kơnòm să; Tam ya tik tok... Mờ tềng đap jơnau kờñ bơsram tàp, bơtàu tơnguh bơta chài bơh kơnòm dềt dê, tàm càr Kon Tum bơdìh mờ ală hìu niam chài bơh Dà lơgar dê tàm tơngai kàl rơlô bơkang do gam geh bơta tus bal bơh uă mpồl cau, cau dùl nă să is tàm broă bơyai lơh ală tiah nhơl ñŏ ai kơnòm dềt in. Jat ồng Phạm Văn Thắm, Phó Kwang atbồ Anih tờm Niam chài Tàp pràn să jan Ơruh pơnu, Kơnòm pa tàu mờ kơnòm dềt càr Kon Tum yal, do là tềl tơngŏ niam ngan lơh geh bơta li la, bơta tàm pơrlòng niam mờ cau dờp geh bơta kwơ hơ̆ là ală kơnòm dềt.

Hơ̆ là mpồl bơtiàn lơh bal bè niam chài. Gơtùi đơs là drà niam chài cau dê lơh niam chài là uă ngan. Ơdŭ bơto đờng, ơdŭ đơs crih, ơdŭ tam ya. Đah bơdìh lơh ờ di là pơgap mờ do 10 nam mìng geh Anh tờm ờ lơh gơlik geh dùl bơta tàm pơrlòng ờ. Pal bơcri priă lơh niam bè măy mok phan bơna, bè kòn bơnus den hơ̆ sồng gơ hòi gơ jà ală kơnòm dềt. Mờ bơsram bơta chài să tờm dê kung là tiah tus bal is ờ gŏ di là jơnau bơlơn ală oh dê ờ.

Tơnơ̆ ală kàl rơlô bơkang uă ngan ơm tàm hìu nàng rcang sơndră kòp Kovid-19, kàl rơlô bơkang nam do ală kơnòm pa tàu, kơnòm dềt tàm càr Kon Tum neh geh tus bal ală broă lơh tơrgùm bal mờ he kờñ. Ală ơdŭ bơto bơta chài să tờm dê, bơsram bơta chài, broă lơh sền gĭt tŭ do gam geh ală kơnòm dềt tus bal uă ngan. Ală Anih tờm, Hìu Niam chài bal mờ bàr pe mpồl cau, cau dùl nă să is tàm càr Kon Tum kung gam wèt tus ală broă lơh rê tàm ală kơnhoàl tiah sar lơgar ngài nàng lơh geh tai uă tiah nhơl ñŏ ai kơnòm dềt in tàm kàl rơbô bơkang do.

 Cau cih Khoa Điềm- Cau mblàng K’ Hạnh