VOV4.K’ho- Tiah Tây Nguyên gam mờr tus kàl mìu, do là tơngai ơn phơng chi tam in. Tŭ do, bal mờ khà priă phơng sih gam gơguh jơnhua ngan, tàm càr Kon Tum cau tam kơphe tàm kơnhoàl Đăk Hà gam git gŏ dùl ròt ƀàu phơng dờng màng siñ họk An Thái NPK ờ tơl kĭ tai.

Lài mờ sa tềp bơhiàn Ñâm Zần 2022, bi Nguyễn Văn Trung, hìu tàm tổ dân phố 2B, thị trấn Đăk Hà, kơnhoàl Đăk Hà, càr Kon Tum, là kông ñân kông ty TNHH MTV Kơphe 731, gơ wèt Tổng Kông ty kơphe Việt Nam ai lài bơh kông ty dê 20 ƀàu phơng dờng màng siñ họk An Thái NPK, kơn jơ̆ tơl ƀàu phơng là 50 kĭ nàng ơn tờm kơphe in. Tŭ tùng ƀàu phơng, sền gŏ gơ lơh nggờc rlau mờ bè ờs, bi kơng ƀàu phơng den git gŏ jơh ală ƀàu phơng ndrờm ờ tơl kĭ pơndrờm mờ jơnau tơnggit geh cih tềng ƀàu: “Añ dờp khà phơng do bơh Kông ti TNHH MTV Kơphe 731. Añ dờp phơng tàm pơgap ngai 26. 27 sa tềp. Añ là cau lơh broă sa, tŭ tùng ƀàu phơng gŏ gơ lơh nggờc rlau den añ kung kơlôi là digơlan là tơl kĭ, den cèng kơng nàng sền bè lơi. Sền gŏ ờ tơl kĭ den añ kung yal bơh cau atbồ bơh mpồl lơh sa dê”.

Bơh git gŏ ƀàu phơng ờ tơl kĭ bơh bi Nguyễn Văn Trung dê, uă kông ñân ndai kung dờp ai lài phơng bơh Kông ty TNHH MTV Kơphe 731 neh kơng nàng sền den kung git gŏ ală ƀàu ờ tơl kĭ lơm, mờ uă ngan là ờ tơl bơh 1 tus 1 kĭ mờ nggùl tàm dùl ƀàu. Bi Bùi Đình Kiên ơm tàm Tổ dân phố 2A, thị trấn Đăk Hà, kơnhoàl Đăk Hà pà git: “Hìu bơnhă añ dờp 10 ƀàu, kờp jơh kơn jơ̆ 5 tạ, bau oh ùr añ dê den ai tus 1 tấn. Kơng dùl ròt den gŏ kĭ bơh ală ƀàu dê ờ tơl pơgap bơh 1 tus 1 kĭ mờ nggùl. Làng bol kung bè kông ñân bè bol hi ờ git loh bè lơi, ờ gơtùi pin dờn tàm kông ty tai. Bol hi lơh gơlik gar kơphe neh kal ke, bòl glar. 2 kĭ kơphe ờ hềt blơi geh dùl kĭ phơng sơl, mờ tàm tŭ hơ̆, phơng tŭ do gam đơs bè khà, bol hi ờ hềt khin đơs tus bơta niam”.

Bi Nguyễn Văn Trung, cau git gŏ ală ƀàu phơng ờ tơl kĭ

Dờp jơnau yal bè bơta ală ƀàu phơng sih dờng màng siñ họk An Thái NPK ai kông ñân ală mpồl lơh sa in ờ tơl kĭ, kwang đơng lam bồ kông ty TNHH MTV Kơphe 731 neh sồr cau lòt sền, pà git, tơl ƀàu ndrờm ờ tơl 1 kĭ 2 pơndrờm mờ khà cih tềng ƀàu mờ sră porgon. Ồng Nguyễn Hữu Tư, Phó Kwang atbồ kông ty pà git, khà phơng do kông ty neh blơi 2 rbô 256 ƀàu bơh mpồl tac phơng là Kông ty TNHH MTV ngui kông nghệ kao SVD geh anih lơh broă tàm ƀòn dờng Kon Tum nàng ai kông ñân in. Tŭ lơh broă mờ Kông ty TNHH MTV Kơphe 731, ala mat mpồl tac phơng là ồng Lê Quang Dũng, Củ tịc mờ là kwang atbồ neh dờp, geh bơta ờ tơl kĭ bơh tơl ƀàu phơng dê mờ đơs lài tài bơh tìs bơh broă ơn tàm ƀàu dê. Bè broă bơsong khà phơng ờ tơl kĭ, ồng Nguyễn Hữu Tư đơs nền, mpồl tac phơng neh dờp kơnòl : “Bi Dũng đơs là lài ngan bi geh kong kơnòl bè broă ờ tơl kĭ phơng cau lơh broă in. Dơ̆ 2 là bi geh dan să jơh gùt kwang bàng, kông ñân, cau lơh broă kông ty kơphe dê”.

Dùl ƀàu phơng dờng màng siñ họk An Thái NPK ờ tơl kĭ

Jòi git nền cê neh geh êt ngan rlau jơh 3 nam Kông ty TNHH MTV Kơphe 731 gơ wèt Tổng Kông ty kơphe Việt Nam tàm kơnhoàl Đăk Hà, càr Kon Tum kĭ sră pơrgon blơi phơng sih dờng màng siñ họk An Thái NPK mờ Kông ty TNHH MTV Ngui kông nghệ kao SVD ai kông ñân in nàng ơn tàm kơphe in. Jơnau tơnggit cih tàm ƀàu phơng sih dờng màng siñ họk An Thái NPK ờ tơl kĭ ai gŏ, phơng sih geh ngui ai ală bơta chi tam in mờ geh lơh gơlik bơh Kông ty TNHH Kông nghệ hữu kơ siñ họk An Thái, tàm bă C4B, anih lơh sa mờ măi mok Hoà Bình, ƀòn dờng Kon Tum, càr Kon Tum.

Cau mblàng K’Duẩn