VOV4.K’ho - Lơh jăt broă lơh jăt jơnau kờñ bơh dà lơgar “Tơl xã dùl bơta phan” OCOP, nam 2021 càr Kon Tum bơ̆t bơtàu geh 58 bơta phan tơnguh khà phan OCOP bơh càr tus 146 bơta phan mờ ndrờm geh bơh 3 tus 5 sơrmañ. Tàm bơta kal ke, gơrềng bơh kòp Kovid-19, ală cau tờm bơh phan OCOP, gah lơh broă geh gơnoar càr Kon Tum neh geh uă broă bơceh lơh tàm broă pơgồp bal, kă bro ai phan geh lơh pơgồp bal tàm broă tơnguh rài kis làng bol ƀòn lơgar.

Xã Đăk Pxi, kơnhoàl Đăk Hà, càr Kon Tum geh pơnrơ ngan mờ phan OCOP ƀang gle brê pơr ro. Nam 2021, làng bol tàm xã lơh geh di pơgăp 12 tấn tăc tàm drà kă bro.

           Tơnguh bơtàu tiah tam phan lơh sơnơm, drơng broă lơh phan OCOP tàm kơnhoàl Đăk Tô

Tàm bơta kòp Kovid-19 gơtìp kal ke, phan OCOP ƀang gle ro bơh xã Đăk Pxi kung gam geh cau ngui sa dờp. Bi A Sáo, kis tàm ƀòn Kon Pao Kla pà git, kơnờm mờ broă tus bal lơh phan OCOP tơnguh geh bơta kwơ, làng bol tàm xã geh tai priă nàng tơnguh rài kis, bơh tŭ hơ̆ sơlơ geh tai broă lơh niam ai phan geh lơh bơh să tờm dê: “Bơh nhai 7 làng bol mŭt tàm broă jòi ƀang. Làng bol lơh is phan geh bơh ƀang gle lời ro. Nàng geh phan kloh niam, tăc mờ lơgar bơdìh tơnơ̆ mờ tŭ neh geh ƀang gle pal mhar trah sơbì kơmhò mờ pal gơm mơ. Hơ̆ sồng tă tram tàm dà mrềt, rào kloh, tah dềt ìs tàm trồ tơngai ha là pơr mờ ồs rơnga. Lài mờ tŭ klơm gơs phan tăc gam pal sơbì ală ƀang ờ niam, rơwah ală ƀang niam ngan den cau blơi hơ̆ sồng kờñ, sa hơ̆ sồng bơkah. Làng bol geh priă bơh ƀang gle den tàng sơlơ kờñ lơh ngan mờ sơlơ geh kơnòl uă”.

                                       Dùl hìu tăc yal phan OCOP tàm ƀòn dờng Kon Tum

Nam 2021 tàm bơta kòp Kovid-19 gơtìp kal ke, ală mpồl lơh sa kă bro, hợp ták xã, hìu kă bro tàm càr Kon Tum gam lơh geh 58 bơta phan OCOP mờ phan geh lơh neh geh lài tàm càr do. Tàm hơ̆ geh pơnrơ ngan là mpồl phan geh lơh bơh kơnuh sơnơm Ngọc Linh, kơphe, sâm dây, plai chi... Lŏ Hồ Thị Kim Oanh, Kwang atbồ Kông ty Cổ phần Thương mại-Lơh mờ broă lơh drơng ala Lâm Thịnh, tàm kơnhoàl Dăk Tô pà git, mpồl lơh sa kă bro neh lơh geh phan ce sâm dây Ngọc Linh geh khà 3 sơrmañ mờ gam pơn jăt tai lơh gơs broă lơh ờ uă bơta phan ndai. “Kông ty pa tus bal tàm broă lơh OCOP. Tŭ tus tàm drà kă bro bè bơta pràn tàm pơrlòng kă bro pơn ndrờm mờ ală bơta phan kă bro ndai, cau geh nùs nhơm kă bro neh jŏ bloh den pơn drờm mờ he pal lơh den gam ờ jai uă ngan. Tơnơ̆ mờ 2 nam tus bal tàm broă lơh phan OCOP, khà măt neh geh lơh niam uă ngan. Bè nùs nhơm kă bro gơguh ờ uă ngan là 50% bè bơta pràn tàm pơrlòng, bè măt phan mờ kơl dung hơ̆ sồng bơta phan niam geh lơh. Tŭ he tus bal tàm ală drà kă bro điện tử Shopee den he kung ndrờm bal mờ ală bơta phan ndai sơl”.

                    Yal phan OCOP kơnhoàl Đăk Hà tàm pơrjum cau ùr mŭt lơh broă càr Kon Tum

Kờp jơh nam 2021, càr Kon Tum neh lơh geh 146 bơta phan OCOP rơndăp săp sèng bơh 3 tus 5 sơrmañ. Nàng geh ai tơngŏ khà măt phan kă bro, tơnguh uă bơta kwơ phan geh lơh, broă pơgồp bal drà kă bro geh sền gròi. Tàm bơta kòp Kovid-19, ală cau tờm phan OCOP mhar geh tam gơl tus mờ broă kă bro tàm drà kă bro điện tử bè gah blơi phan Lazada, Shopee, Sendo, Tiki. Mò Lương Thị Mỹ Huệ, Kwang atbồ Kông ty TNHH Thảo dược Tây Nguyên đơs, mpồl lơh sa kă bro neh geh cồng nha kơnờm mờ broă tam gơl di tŭ: “Ờ geh lơh jăt ală broă hòi jà bơcri priă den tàng mpồl lơh sa kă bro pal jòi gùng lòt să tờm in. Mpồl lơh sa kă bro neh tus bal mờ ală drà kă bro điện tử bè Tiki, Shopee. Mìng geh ală gah kă bro do hơ̆ sồng geh. Drà kă bro điện tử den geh cồng nha ngan”.

Ồng Nguyễn Quang Hoà, Phó kwang atbồ Ci kụk tơnguh bơtàu ƀòn lơgar càr Kon Tum pà git, tàm bơta kal ke bơh kòp Kovid-19, lơh broă bal mờ ală mpồl lơh broă, hợp ták xã, hìu lơh sa kă bro nàng ka bro phan OCOP, kông ty neh lơh jăt niam gơnoar pơgồp bal mờ drà kă bro, dong kờl tăc phan geh lơh. Kơnờm mờ hơ̆ ờ mìng lơh gơmù tus mờ khà ờ uă ngan, tài gơrềng bơh kòp gơtờp mờ gam chồl pràn broă kă bro tàm điện tử: “Tàm bơta kòp Kovid-19, Sở Nông nghiệp kung neh pơlam UɃÑZ càr crơng gơs mpồl lơh broă đơng lam lơh mờ pơgồp bal kă bro phan geh lơh bơh broă lơh sa suơn sre tàm càr. He kung yal jơh ală bơta phan OCOP he dê tus mờ Ƀộ Nông nghiệp mờ chồl pràn tus ală gah kă bro điện tử mờ drà kă bro điện tử. tàm tơngu me hơ̆ cau tơlik jơnau tơngit tus den he kung yal wơl ală mpồl lơh broă he in nàng kă bro tềng đăp măt mờ jŏ jòng. Gam gơwèt mờ siêu thị den yal jơh phan OCOP bơh he dê neh geh khà”.

Ală mpồl lơh sa kă bro, hợp ták xã, hìu kă bro tàm càr Kon Tum nam pa do neh lơh ngan tam gơl tus mờ broă kă bro điện tử, neh ai geh broă lơh pràn tàm broă kă bro phan tơn tàm bơta kòp Kovid-19. Làng bol lơh broă sa ờ gơtìp kòl phan geh lơh bơh broă lơh sa suơn sre, geh priă satềp do kung gam hờm ram mờ gơboh gơbài.

Cau cih Khoa Điềm- Cau mblàng Ndong Brawl