VOV4.K’ho- Tàm càr Kon Tum tàm ală ngai do, ală cau bơtờp pa kòp Kovid-19 sùm gơguh mờ kờp tus ngai 23/02 kờp jơh khà cau F0 bơh càr dê bơh sơnrờp tơngai bơtờp kòp neh sơrlèt rlau 6 rbô nă.

Kwang đơng lam càr Kon Tum lòt sền broă lơh rơcăng sơndră kòp Kovid-19 tàm xã Đăk Môn, kơnhoàl Đăk Glei

Lài hơ̆, tàm bàr ngai 21 mờ 22/02, gah lơh sơnơm càr Kon Tum kung neh gŏ jơh gùt càr geh tai 344 nă cau F0. Bơta pal kơlôi rơcăng ngan là khà cau bơtờp pa kòp Kovid-19 tàm càr ngai sơlơ geh gŏ uă tàm tiah sar lơgar ngài mờ tiah làng bol jơi bơtiàn kòn cau dùl êt nă cau ơm kis. Nàng tơnguh uă cồng nha broă lơh rơcăng sơndră kòp, Mpồl đơng lam rơcăng sơndră kòp Kovid-19 càr Kon Tum dê sồr làng bol bañ dơrcul nùs, ờ gŏ di rơngòt, kơlôi rơcăng ir mơya kung ờ gŏ di sền ờ sơ̆p, ờ gŏ rơcăng ngac; Pơgồp bal niam mờ ală anih lơh broă geh gơrềng, gơnoar ătbồ tiah he dê tàm broă lơh rơcăng sơndră kòp Kovid-19; Lơh jăt niam jơnau sồr 5k mờ vaccine tàm rơcăng sơndră kòp Kovid-19 jăt jơnau bơto sồr bơh Ƀộ Y tế dê ngan là pơn chèu glòm muh mat tŭ lik bơdìh hìu mờ lơh jăt broă lơh sồr cĭt vaccine kòp Kovid-19.

Cau mblàng Lơ Mu K’Yến