Tơnơ̆ dùl ròt ală broă lơh neh lam lơh jat nàng kờñ kơryan bơta pơhìn hoàc huơr phan kwơ tàm ù mờ lơh roh priă dia bơh broă lơh tơnhào, kă bro bràs, lŭ rơdeh tàm dơlam dà dờng, pa do Ủy ƀan Ñân zân càr Kon Tum geh sră nggal sồr Sở, ngàñ geh gơnoar, gơnoar atbồ ală tiah tàm càr sơlơ tơnguh broă atbồ rơndeh rơndồ măi mok tàm gùng dà geh crăp măi mok, phan ngui jồp bràs, lŭ rơdeh.

Nàng kơryan bơta pơhìn lơh roh priă dia bơh broă lơh tơnhào, kă bro bràs, lŭ rơdeh tàm dơlam dà dờng, Ủy ƀan Ñân zân càr Kon Tum kung neh sồr Kụk tă dia càr sơlơ tơnguh broă lơh lùp sền, lòt sền broă lơh jat adat boh lam bè tă dia, sră blơi phan mờ bơta jơnau cih yal, lơh jat kơnòl broă tă dia gơwèt mờ kes priă Dà lơgar bơh mpồl cau, cau dùl nă să geh broă lơh tơnhào phan kwơ tàm ù; lơh glài kràñ ală cau lơh tìs adat boh lam bè dia, priă tă mờ sră blơi jat di mờ jơnau cih adat boh lam dê; di tŭ sền gŏ, lơh glài kràñ ală mpồl lơh broă yal, cih yal ờ song.