VOV4.K’ho- Mho ngai 12/09, Ƀan Tuyên giáo Tỉñ ủy Kon Tum bơyai lơh dơ̆ lam lơh dơ̆ pơrlòng jòi gĭt “Kon Tum-110 nam bơt bơtàu mờ bơtàu tơnguh”. Dơ̆ pơrlòng geh bơyai bơh 2 broă lơh: Pơrlòng cih jơnau mờ pơrlòng trắc nghiệm tàm Pang yal tơngĭt jơnau điện tử bơh Ƀan Tuyên giáo càr Kon Tum dê.

Anih tàm dơ̆ lam lơh

Broă lơh pơrlòng cih jơnau geh 3 jơnau lùp mờ tơngai ndŭt ndơl tong jơnau tus bal pơrlòng tàm ngai 20/11/2022. Broă lơh pơrlòng trắc nghiệm geh bơyai lơh tàm 3 nhai, sơnđờm bơh 6 jiơ drim ngai 13/09 tus 9 jiơ mang ngai 13/12/2022. Mpồl bơyai lơh dơ̆ pơrlòng kờp dŭ geh bơyai lơh dơ̆ tơn jơh mờ jàu khà jờng dơ̆ pơrlòng lài mờ ngai 5/02/2023. Dơ̆ pơrlòng nàng kờñ mblàng yal, bơto bơtê ai ală rơnàng làng bol in, ngan là rơnàng kơnòm să in gĭt wă loh làng rlau tai bè rài kah yau crơng gơs mờ bơtàu tơnguh bơh càr Kon Tum dê. Bơh hơ̆, pơgồp bơnah tơnguh uă bơta gĭt wă tàm broă sền gàr, ngui niam ală bơta kwơ ờs mờng kah yau mờ bơta niam chài rơgơi bơh ƀòn lơgar mờ dà lơgar dê.

Cau mblàng K’Hạnh