Kon Tum lam lơh jơh gùt làng bol bơto re dà rcang lài kơryan bŭ dà
Thứ tư, 06:00, 22/05/2024
Cau mblàng K’Hạnh/VOV Tây Nguyên
Cau mblàng K’Hạnh/VOV Tây Nguyên
VOV4.K’Ho- Drim òr (21/05), Sở Văn hoá, Thể thao mờ Zu lịc pơgồp bal mờ Sở Giáo dục mờ Đào tạo càr Kon Tum bơyai lơh dơ̆ sơnđờm mut lơh kàl rơlô bơkang, ngai Olympic kơnòm dềt mờ lam lơh jơh gùt làng bol bơto re dà, rcang lài kơryan bŭ dà, mờ bơta tus bal bơh rlau 1 rơbô 300 nă kơnòm dềt.
Càr Kon Tum geh uă dà dờng, dà croh ngòt rơngơ̆t ngan mờ gĭt nđờ rơhiang tơnau dơng dà, rƀòng dà geh bơta jrô uă ngan. Bơta bŭ dà sùm gơlik geh ngan rlau jơh là gơwèt mờ kơnòm dềt tàm kàl rơlô bơkang.
Nàng gàr niam bơta lơngăp lơngai ai mờr 168 rơbô nă kơnòm bơsram bơh càr dê in tàm dơ̆ ơm rlô bơkang nam do, càr Kon Tum hòi jà ală kấp, ală ngàñ, hìu bơsram, hìu bơnhă mờ jơh gùt mpồl bơtiàn sơlơ tơnguh sền gròi nàng kờñ tơrmù ƀà rềs àr sồt să, is ồn ngan là rềs àr bŭ dà gơwèt mờ kơnòm dềt. Càr rơ̆p tơrgùm jơh ală bơta re dà pa ngan tŭ do, nàng lam bơto re dà, yal tơngĭt mờ mblàng yal bè bơta chài rcang lài kơryan bŭ dà ai kơnòm dềt in; mơkung hòi jà lơh gơ rề uă nùs nhơm bơsram re dà tàm mpồl bơtiàn.
Viết bình luận