VOV4.K’ho- Tơnơ̆ rlau 2 nam gơtìp ơm tài bơh kòp Kovid-19, tàm càr Kon Tum di dơ̆ ơm rơlô bơkang do, ală ơruh pơnu, kơnòm pa tàu mờ kơnòm dềt geh tus bal tàm uă broă lơh nàng bơtàu tơnguh bơta jak chài bơh he dê bơh uă gah nhơl chờ gam geh lam lơh.

Ơdŭ bơsram bơta jak chài broă lơh Đội bơh Anih tờm Niam chài Tàp pràn să jan ơruh pơnu, kơnòm pa tàu mờ kơnòm dềt càr Kon Tum in

Tus tŭ do, ală Anih tờm, Hìu niam chài tàm càr Kon Tum neh lam lơh jat broă rơndap lơh broă lơh kàl rơlô bơkang nam 2022 mờ sơnđờm dờp ơruh pơnu, kơnòm pa tàu mờ kơnòm dềt tàm ală ơdŭ bơsram bơta jak chài, bè: võ thuật, re dà, wăc sềr rùp, bơsram jơnau dà Mỹ... Kờp dŭ tàm kàl rơlô bơkang do, khà ală ơruh pơnu, kơnòm pa tàu mờ kơnòm dềt tàm càr Kon Tum tus bal tàm ală tiah nhơl chờ nàng bơtàu tơnguh bơta jak chài bơh  he dê geh tơnguh pràn. Bi Nguyễn Thị Tuyết Mai, Kwang atbồ Cơdŭ Bơto bơtê mờ bơsram Đoàn- Hội- Đội mờ bơta chài bơto pơlam broă lơh, Anih tờm Niam chài Tàp pràn să jan Ơruh pơnu, kơnòm pa tàu mờ kơnòm dềt càr Kon Tum dê pà gĭt, Mpồl neh rcang ai bơta digơlan geh khà ală kơnòm dềt ơruh pơnu, kơnòm pa tàu mờ kơnòm dềt tus bal ală ơdŭ bơsram bơta jak chài tàm tơngai ơm rlô bơkang nam do gơguh nisơna.

Cau mblàng K’Hạnh