VOV4.K’ho- Tàm càr Kon Tum, dùl Hợp ták xã pa lơh sa kă bro gah phan lơh sơnơm- nhơl chờ geh ală cau tàm mpồl tus bơh ală càr mờ gal ngan, neh tơlik mat mut lơh broă tàm xã kal ke uă Măng Ri, kơnhoàl Tu Mơ Rông.

Phan bơna kơnuh sơnơm jriang bơh cau tàm mpồl Hợp ták xã phan lơh sơnơm nhơl chờ Ngọc Linh H80 dê

Hợp ták xã phan lơh sơnơm nhơl chờ Ngọc Linh H80 geh 172 nă cau tàm mpồl, tàm hơ̆ geh 50% cau tàm mpồl là làng bol kòn cau dùl ết nă cau mờ uă cau tàm mpồl tus bơh ală càr, ƀòn dờng ndai. Do là Hợp ták xã geh uă cau tàm mpồl ngan rlau jơh càr Kon Tum dê lơh broă kă bro gah broă do mờ là broă geh tơrlòng lài bơh kơnhoàl Tu Mơ Rông dê. Hợp ták xã ai jơnau kờñ ai broă lơh bơh sơn rờp geh gơrềng tus lơh sa ai ală cau tàm mpồl in; dong kờl cau tàm mpồl tăc phan bơna lơh geh bơh suơn sre; bơto pơlam cau tàm mpồl lơh sa lơh geh tơnhào, geh cồng nha; dong cau tàm mpồl lơh sir bơta chài atbồ broă lơh sa; dong kờl bal mờ gơ̆p đah ală cau tàm mpồl mờ Hợp ták xã kung bè đah Hợp ták xã mờ mpồl bơtiàn tiah do dê. Tus tŭ do càr Kon Tum geh 218 Hợp ták xã mờ 1 Mpồl tam klăc Hợp ták xã. Kờp jơh priă bơcri mut lơh, phan bơna bơh ală Hợp ták xã, mpồl tam klăc Hợp ták xã dê là 275 tơmàn đong. Bơta geh ngan pà gŏ ală hợp ták xã do ngai sơlơ ngăc ngar rlau mờ broă lơh drà kă bro dê, lơh tờm tàm broă lam lơh broă lơh mờ geh ală tă pơgồp geh ngan ai broă lơh bơtàu tơnguhlơh sa- mpồl bơtiàn càr Kon Tum dê.

Cau mblàng K’Hạnh