Trồ tiah tơngai duh jŏ jòng tŭ do gam lơh uă bă brê tàm càr Kon Tum kong mờ jơnau pơhìn gơlik geh ồs sa uă ngan. Tàm càr neh gơlik geh 2, 3 dơ̆ ồs sa brê lơh 2 nă cau chơt. Tŭ do, làng bol, cau tờm brê, mpồl lơh broă geh gơnoar tàm càr Kon Tum gam lơh ngan rơcang sơndră ồs sa brê. Jơnau yal bơh Ci kụk Kiểm lâm càr Kon Tum dê ai gŏ, tŭ do neh geh 8 tàm 10 kơnhoàl, ƀòn dờng bơh càr dê ơm tàm jơnau đơs lài geh jơnau pơhìn ồs sa brê kâp 5- là kâp ngòt rơngơt ngan. Tàm ală kơnhoàl tiah đah mat tơngai lik càr dê, bè: Ia H’Drai, Sa Thầy, Đăk Tô, Ngọc Hồi, geh mờr 230 rbô lồ geh jơnau pơhìn gơlik geh ồs sa uă ngan.

Ci kụk Kiểm lâm càr Kon Tum pà git, bal mờ rơcang sơndră ồs sa brê tàm ù tiah ngan ngồn, Ủy ƀan Ñân zân càr kung neh lơh sir ală jơnau sồr nàng lơh gơlik bơta ring bal tàm broă lơh rơcang sơndră ồs sa brê. Tềng đap gơlik geh kal ke bơh trồ tiah dê, kàl prang duh digơlan gam jŏ jòng, jơnau pơhìn gơlik geh ồs sa brê uă ngan, làng bol, cau tờm brê, mpồl lơh broă geh gơnoar mờ gơnoar atbồ ală kâp bơh càr Kon Tum dê gam lơh ngan rơcang sơndră ồs sa brê.