VOV4.K’ho- Tàm tiah Tây Nguyên, mìu càl rơbŭt dờng sồ 4 aniai uă tàm Kon Tum. Uă gơl gùng gơtìp gơ kòl tài bơh dà tih ngơr gan gùng lòt mờ bơta tơrlah taluy dương. Kơnờm rcang lài ală broă lơh rcang sơndră mờ mìu càl rơbŭt dờng den tơnơ̆ tŭ gơlik geh bơta hoàc huơr tàm ală gơl gùng, gah Giao thông Vận tải càr Kon Tum mờ gơnoar atbồ ală tiah neh tơrgùm mpồl cau gàr niam gùng lòt mờ lam lơh bơsong jơnau gơ lời wơl.

Ală tiah tơrlah ù tàm gùng dờng 24 neh geh sơr băc mhar chŏ sang

Ngan là tàm gơl gùng Hồ Chí Minh gơl lòt gan kơnhoàl Đăk Glei tềng bơta dà kŏ dà tih gơguh uă lơh ngơr jrô, mpồl lơh broă geh gơnoar ai cau ơm gak, sơn tơ̆p kƀàng yal tơngĭt kơryan ờ ai cau mờ rơndeh rơndồ lòt gan tiah ngơr jrô nàng gàr niam bơta lơngap lơngai. Gùng dờng 40B gơl lòt gan kơnhoàl Tu Mơ Rông, gùng dờng 24 gơl lòt gan kơnhoàl Kon Plông gơlik geh uă tiah tơrlah ù. Mpồl lơh broă geh gơnoar tơrgùm ai măy mok mờ mpồl cau khòm tơrgùm, den rơndeh neh lòt rê wơl.

VOV.vn- Cau mblàng K’Hạnh