Ngai 18/5, tàm ƀòn dờng Kon Tum, Ƀan Thường vụ Tỉñ uỷ Kon Tum bơyai lơh Pơrjum sền wơl 2 nam lơh jat Jơnau đơs pơndŭt sồ 01 bơh Ƀộ Cíñ trị dê bè “Lơh pràn broă bơsram mờ lơh jat bồ tơngoh, nùs nhơm, broă lơh mờ rài kis Hồ Chí Minh dê” mơkung jờng rơ, pà khà jờng ală mpồl cau, cau dùl nă să pơn rơ jak tàm broă bơsram mờ lơh jat krơh Bác Hồ dê. 2 nam do càr Kon Tum neh bơt bơtàu geh mờr 1 rơbô 300 broă lơh niam, broă lơh geh cồng nha tàm broă bơsram, lơh jat krơh Bác Hồ dê. Pơn rơ bè broă lơh “Jơnau ntas klèng bơsram”, “Hìu bơsram chờ hờp” bơh gah Bơto bơtê dê, “Ngai dơ̆ 5 wèt rê tàm ƀòn lơgar” bơh Đảng ƀộ kơnhoàl Đăk Glei dê; “Yăng phe bơta nđàc” bơh Đảng ƀộ kơnhoàl Ngọc Hồi dê...

Broă lơh pràn bơsram mờ lơh jat krơh Bác Hồ dê neh pơgồp bơnah tơnguh uă bơta gĭt wă, kơnòl bơh ală kấp ủy, mpồl Đảng, anih lơh broă, mpồl lơh broă tàm broă lơh jat kơnòl broă cíñ trị geh jàu; tam gơl tàm ală nùs nhơm lơh broă bơh mpồl kwang bàng, kông cứk, viên cứk dê jat gùng dà ngai sơlơ jak chài, geh cồng nha. Tàm pơrjum, Ƀan Thường vụ Tỉñ ủy Kon Tum sồr ală kấp, ngàñ, ală tiah, anih lơh broă, mpồl lơh broă tàm càr pơn jat tai tam gơl pa rơndap broă lơh, tơnguh uă bơta niam nàng broă bơsram mờ lơh jat krơh Bác Hồ dê gơ gơs nùs nhơm gĭt wă is, lơh broă sùm, sùm sùm tàm tơl nă kwang bàng, đảng viên, kông cứk, viên cứk, cau lơh broă...

Tàm pơrjum 21 mpồl cau, 30 nă cau dùl nă să chờ hờp ngan geh dờp Sră pơyoa jờng rơ bơh Ƀí thư Tỉñ ủy Kon Tum dê; 19 mpồl cau mờ 26 nă cau dùl nă să geh Ủy ƀan Ñân zân càr Kon Tum pà Ƀằng khen.