Geh lơh tàm 02 ngai, 20 mờ 21/09 pa do, Pơrjum dờng cau ala măt Mpồl Cau lơh broă sa càr Kon Tum dơ̆ IX, tơngai lơh broă bơh nam 2023- 2028 neh gĭt nền uă jơnau kờñ, broă lơh kwơmàng tàm broă lơh Mpồl mờ srơh cau lơh broă sa tàm 05 nam tus. Pơrjum dờng cau ala măt Mpồl Cau lơh broă sa càr Kon Tum dơ̆ IX geh 277 nă cau ala măt ngan ngồn ala măt ai rlau 65 rbô nă cau lơh broă sa tàm mpồl bơh càr dê in.

Tơngai lơh broă bơh nam 2023- 2028 pơrjum dờng gĭt nền uă jơnau kờñ kwơmàng, jơh nùs lơh ngan bơ̆t bơtàu Mpồl Cau lơh broă sa ală kâp tàm càr pràn kơldang kơ̆ kơl jăp tơl ală bơta; Mblàng yal, hòi jà cau lơh broă sa bơtàu tơnguh lơh broă sa sươn sre, bơ̆t bơtàu ƀòn lơgar pa; Sền gròi sền gàr gơnoar mờ bơta kwơ dipal mờ adat boh lam bơh cau tàm mpồl cau lơh broă sa dê; Tơnguh uă srơh “Cau lơh broă sa tàm pơrlòng lơh sa kă bro jak, tam klăc tàm dong kờl bal mờ gơ̆p lơh pas mờ tơrmù rƀah kơ̆ kơl jăp” gơjăt bal mờ dơ̆ hòi jà “Lơh tam gơl bồ tơngoh kơlôi sơnơng, broă lơh bơh làng bol jơi bơtiàn dùl êt nă cau dê, lơh ai làng bol jơi bơtiàn dùl êt nă cau in brồ guh lik klàs rƀah kơ̆ kơl jăp”, pơgồp bơnah bơ̆t bơtàu càr Kon Tum bơtàu tơnguh mhar mờ kơ̆ kơl jăp. Pơrjum dờng cau ala măt Mpồl Cau lơh broă sa càr Kon Tum dơ̆ IX, tơngai lơh broă bơh nam 2023- 2028 pồ Mpồl lơh jăt kơnòl broă tơngai pa geh 32 nă cau. Ồng Nguyễn Quang Thủy geh pồ ăt gơnoar broă Kwang ătbồ Mpồl Cau lơh broă sa càr Kon Tum.