Tơnơ̆ uă nam geh bơyai lơh, Broă lơh Kơphê Mpồl lơh sa kă bro- Cau lơh sa kă bro bơyai lơh pah nhai bơh Ủy ƀan Ñân zân càr Kon Tum dê neh gơ gơs tiah ală mpồl lơh sa kă bro yal bè ală broă gơtìp geh tàm broă lơh sa, bơcri priă, lơh sa kă bro bal mờ ală bơta kòl yan priă jền kờñ tă bơsong. Bè broă bơh dùl mpồl lơh sa kă bro bro tơnhào phan kwơ tàm ù dê, bulah gơ kờn tàm pơrlòng giă mơya ờ gơtùi mut lơh tơnhào phan kwơ tàm ù do tài bơh ờ geh gơnoar lơh mờ tàm tơrbŏ gùng lòt tàm gùng dờng 24 nàng jun pơndiang phan. Ồng Huỳnh Thanh Tú, ala mat mpồl lơh sa kă bro đơs jơnau đơs:“Rơndăp broă lơh bơh Kông ty Hoàng Khánh Trâm tàm kơnhoàl Kon Plông dê. Do là rơndăp broă lơh tơnhào phan kwơ tàm ù là phan bơna bơh Dà lơgar dê. Ủy ƀan Ñân zân càr neh rơndăp ù tiah phan kwơ tàm ù mờ ai pơrlòng giă. Mpồl lơh sa kă bro gơ kờn tàm pơrlòng giă nam 2019. Ring bal broă lơh bơcri priă lơh tơl làm jơh rao tŭ do dan sră ai gơnoar tơnhào phan kwơ tàm ù den Sở Giao thông Vận tải đơs là gơl gùng do ờ geh gơnoar lơh mờ tàm tơrbŏ den tàng là ờ geh ai gơnoar mut lơh. Bè hơ̆ phan bơna do là phan bơna Dà lơgar dê, tăc cau ndai in rao mơya bi ờ gŏ ai cau ndai in jun pơndiang”.

Broă lơh Kơphê Mpồl lơh sa kă bro- Cau lơh sa kă bro bơh càr Kon Tum dê là tiah kwang đơng lam bồ càr iăt, kơno mờ sền gŏ bơta geh ngan lơh broă bơh ală anih lơh broă sră nggal dà lơgar dê. Bè jơnau bơh Kông ty Hoàng Khánh Trâm dê, ồng Lê Ngọc Tuấn, Củ tịc Ủy ƀan Ñân zân càr Kon Tum, ờ mìng gŏ geh bơta kal ke bơh dùl mpồl lơh sa kă bro dê lơm mờ gam geh kal ke tàm broă lơh tàm pơrlòng giă tiah tơnhào phan kwơ tàm ù, phan bơt bơtàu tàm càr dê mờ đơng lam bơsong bơh tàm nggu ryah tờm. Ồng Lê Ngọc Tuấn, đơs:“Bơta do bañ lời cau tờm bơcri priă in hoàc huơr. Jàu ai Sở Giao thông in bơto pơlam cau tờm bơcri priă in lơh sră nggal bè lơi di ngan den hơ̆ sồng yal wơl ai Ủy ƀan in. Bơh tàm tŭ do tus hìng nau jơh ală tiah tơnhào phan kwơ tàm ù phan bơt bơtàu bè ờs là pal gàr geh jơh ală bơta den hơ̆ sồng geh ai tàm pơrlòng giă. Gơ kờn tàm pơrlòng giă den lơh jat lơm mơ gơ dê ờ gam geh bơta kòl yal lơi tai ờ. Lài do ală oh mi ờ hềt lơh sir, tàm pơrlòng giă jơh tŭ lam lơh den gơtìp tus mờ ù gah sền gàr dà lơgar, lơngap lơngai, den gơtìp tus mờ tiah brê, gơtìp tus lơh mờ tàm tơrbŏ gùng lòt. Bơta do ờ di ngan bơh tŭ do tus hìng nau ờ gam geh jơnau gơlik geh bè do tai”.

Jat ồng Trương Lê Mãnh, Củ tịc Mpồl cau lơh sa kă bro kơnòm să càr Kon Tum pà gĭt, ală mpồl lơh sa kă bro tàm càr tŭ do neh geh uă bơta ƀuơn ngan nàng tìp mờ kwang đơng lam bồ càr dê jòi tŭ tơngai niam bơcri priă lơh halà đơs jơnau kơ̆p kờñ, yal ală bơta kòl yan, kal ke. Ală dơ̆ tìp mat bè hơ̆ kung gam geh sùm pah nhai bơh Broă lơh Kơphê Mpồl lơh sa kă bro- Cau lơh sa kă bro halà bơh broă lơh tơm bơh bơr mờ mpồl lơh sa kă bro geh càr bơyai lơh 6 nhai dùl dơ̆. Ồng Trương Lê Mãnh đơs là, do là ală gah cribơyai geh cồng nha ngan ngồn:“Tàm ală broă lơh tìp mat tơm bơh bơr kung bè Kơphê Mpồl lơh sa kă bro- Cau lơh sa kă bro bơh Ủy ƀan Ñân zân càr dê bơyai lơh là dùl gah yal jơnau geh cồng nha ngan nàng gơnoar atbồ in di tŭ gĭt mờ tă bơsong ală bơta kal ke, kòl yan di pal ngan rlau jơh ai mpồl lơh sa kă bro, cau bơcri priă in. Ală kwang đơng lam bồ càr kờñ ngan đơs song, ờ rơngòt, ờ pleh pồn, kràñ cê jơh nùs mờ ală bơta kal ke mpồl lơh sa kă bro dê gơtìp, đơng lam tă bơsong ală bơta gơ kòl kơryan broă lơh lơh sa, kă bro bơh mpồl lơh sa kă bro dê tàm gơnăp gơnoar bơh Ủy ƀan Ñân zân càr dê”.

Bơh nam 2022 tus tŭ do bơh ală dơ̆ tìp mat tam bơh bơr mờ Broă lơh Kơphê Mpồl lơh sa kă bro mờ Cau lơh sa kă bro, kwang đơng lam bồ càr Kon Tum neh cih dờp 136 broă mờ ala mat Mpồl lơh sa kă bro dê đơs mờ càr.

Gơwèt mờ ală bơta kòl yal ƀuơn den geh kwang đơng lam bồ càr Kon Tum tă bơsong tơn. Ală broă kal ke geh gơrềng tus uă kấp, uă ngàñ, kwang đơng lam bồ càr sền gĭt loh kơnòl, jàu kơnòl broă ngan ngồn ai tơl anih lơh broă, mpồl lơh broă, ală tiah in tơrgùm tă bơsong kal ke ai mpồl lơh sa kă bro in. Cồng nha tàm 136 broă tŭ do neh geh 126 broă neh bơsong, 10 broă gam wơl gam pơn jat tai geh sền gròi tă bơsong.

Mò Hồ Thị Kim Oanh, Kwang atbồ Kông ty Kổ phần phan lơh sơnơm Lâm Thịnh Kon Tum, pà gĭt, pa sơnđờm mut lơh broă tơlik mat Kông ty nam 2019 den gơtìp kal ke tài bơh kòp Kovid-19, tàm gùng lòt sơr lèt gan kal ke đơs nền phan bơna tờm Cê kơnuh sơnơm tàm drà kă bro dê, Kông ty sùm dờp geh bơta lòt bal, dong kờl bơh gơnoar atbồ mờ gah lơh broă geh gơnoar càr Kon Tum dê. Mò Hồ Thị Kim Oanh, đơs:“Mpồl lơh sa kă bro sơnđờm mut lơh broă den gơtìp uă ngan ală bơta kal ke mơya geh bơta ƀuơn hơ̆ là bơta dong kờl bơh ală broă lơh bơh càr dê. Chờ hờp ngan tơngai pa do càr neh bơyai lơh ală broă lơh tàm tơrbŏ bal, gơ hòi jà mờ kwơ màng là bơsong ală bơta kòl yan, kal ke bơh mpồl lơh sa kă bro dê. Broă lơh kơphê mpồl lơh sa kă bro tàm nhai lài Kông ty bol añ geh jơnau đơs broă lơh tơnguh uă broă lơh lơh sa nàng tus bal tàm ală drà kă bro kal ke. Kwang đơng lam bồ neh đơs jơnau kơ̆p kờñ bơh bol añ dê mờ Sở Khoa họk mờ Kông nghệ. Tŭ do den bol añ gam lơh broă mờ mpồl lơh broă geh gơnăp gơnoar bơto bơtê kung bè pà cứng cỉ ISO”.

Nùs nhơm lòt bal tă bơsong kal ke dong kờl mpồl lơh sa kă bro bơtàu tơnguh bơh càr Kon Tum dê geh ală mpồl lơh sa kă bro gam lơh sa, kă bro mờ bơcri priă jờng rơ uă ngan. Nhai 4 nam 2023, tàm Dơ̆ yal sơñio sồ pràn jak tàm pơrlòng kấp càr nam 2022 bơh Mpồl Kă bro mờ Lơh sa mờ măi mok lơgar Việt Nam dê bơyai lơh, càr Kon Tum lơh nisơna tŭ gơguh 24 dơ̆ pơndrờm mờ nam 2021 ơm dơ̆ 37 tàm 63 càr, ƀòn dờng. Do là dơ̆ săp sèng jơnhoa ngan rlau jơh càr neh lơh geh tàm 16 nam do. Nàng broă lòt bal tă bơsong kal ke dong kờl mpồl lơh sa kă bro bơtàu tơnguh ngai sơlơ geh ngan, mờ geh cồng nha, càr Kon Tum gam tơrgùm lơh uă broă lơh nàng pơn jat tai lơh niam tiah bơcri priă lơh sa kă bro, tơnguh uă bơta pràn jak tàm pơrlòng. Bal mờ hơ̆ geh broă lơh ai lài dong kờl bơtàu tơnguh pràn tàm tiah lơh sa cau dùl nă să is, sơnđờm mut lơh broă bơceh lơh; lơh geh tiah ring bal tàm broă gĭt ală priă jền đah ală bơnah mpồl lơh sa kă bro; cau bơcri priă; lơh pràn broă lam lơh ngui kông nghệ thông tin, tam gơl sồ; tơnguh uă bơta chài lơh broă bơh mpồl kwang bàng, kông cứk, viên cứk geh nùs nhơm niam, geh bơta sền sơnơng tàm drơng broă, dong kờl mpồl lơh sa kă bro in.