VOV4.K’ho- Tàm 2 ngai 10 mờ 11/10 tàm ù tiah kơnhoàl Tu Mơ Rông, càr Kon Tum mìu dờng. Rơngòt digơlan geh dà tih dờng mờ tơrlah ù, kơnhoàl Tu Mơ Rông ai kơnòm bơsram in ơm rlô bơsram nàng sền gàr lơngăp lơngai. Mùl màl, Ủy ƀan Ñân zân kơnhoàl Tu Mơ Rông sồr Cơldŭ lơh broă Bơto bơtê yal ai kơnòm bơsram in ơm rlô bơsram bơh ngai 11/10 mờ mìng ai kơnòm bơsram in lòt bơsram wơl tàm hìu bơsram tŭ neh lơh geh bơta lơngăp lơngai.

Kơnòm bơsram kơnhoàl Tu Mơ Rông lòt bơsram wơl tơnơ̆ mìu càl rbŭt dờng sồ 4 Noru

Ồng An Văn Sáu, Kwang ătbồ Cơldŭ bơto bơtê kơnhoàl Tu Mơ Rông pà gĭt, anih lơh broă do neh di tŭ yal tus 25 hìu bơsram tàm kơnhoàl in mờ geh 8 rbô 224 nă kơnòm bơsram ală kâp neh ơm rlô bơsram ơm tàm hìu nàng rơcăng pleh lài mìu dà tih. Mpồl kwang ătbồ hìu bơsram, ală pơgru tàm ală hìu bơsram kung neh bơto pơlam ală kơnòm bơsram in lơh jăt bàr pe broă lơh sền gàr niam lơngăp lơngai nàng rơcăng pleh lài mìu dà tih, tơrlah ù tàm tơngai ơm tàm hìu, bè: Ờ gŏ di lòt tus kềng gah dà dờng, dà croh, kŭp ka, kuă lòng; Pleh lòt gan rbàng lìu dà tŭ geh dà gơguh tih, ală anih tơrlah ù.

Cau cih VOV Tây Nguyên- Cau mblàng Lơ Mu K’Yến