Jat hơ̆ ồng Nguyễn Trung Hải, Kwang bàng Mpồl Lơh kơnòl broă sùm, Ƀí thư Đảng đoàn, Củ tịc Anih duh broă Mặt trận Dà lơgar Việt Nam càr dê geh Mpồl Lơh kơnòl broă sùm Tỉñ ủy càr Kon Tum ntrờn, jàu broă mờ pồ lơh kơnòl broă Kwang atbồ Ƀan Tuyên giáo Tỉñ ủy càr Kon Tum. Mò Y Thị Bích Thọ, Kwang bàng Mpồl lơh kơnòl broă sùm Tỉñ ủy càr, Củ ñiệm Anih duh broă Sền sơwì Tỉñ ủy càr geh Mpồl Lơh kơnòl broă sùm Tỉñ ủy càr Kon Tum ntrờn, jàu broă mờ sồr mut tàm Đảng đoàn at gơnoar broă Ƀí thư Đảng đoàn Anih duh broă Mặt trận Dà lơgar Việt Nam càr, tơngai lơh broă bơh nam 2019- 2024.

Ntrờn, jàu broă ai ồng Huỳnh Quốc Huy, Kwang bàng Mpồl Lơh kơnòl broă sùm, Kwang atbồ Ƀan Tuyên giáo Tỉñ ủy càr Kon Tum tus dờp kơnòl broă tàm anih lơh broă Anih Sền sơwì Tỉñ ủy càr nàng pồ bơtơl Kwang bàng mờ pồ at gơnoar broă Củ ñiệm Anih duh broă Sền sơwì Tỉñ ủy càr Kon Tum khoă XVI, tơngai lơh broă bơh nam 2020- 2025. Tàm pơrjum yal mờ jàu jơnau lơh nền ntrờn, jàu kơnòl broă pa gơwèt mờ 3 nă Kwang bàng Mpồl Lơh kơnòl broă sùm Tỉñ ủy càr dê, ồng Dương Văn Trang, Kwang bàng Đảng dà lơgar, Ƀí thư Tỉñ ủy càr, Củ tịc Mpồl Duh broă làng bol càr Kon Tum kơ̆p kờñ tàm gơnoar broă pa 3 nă Kwang bàng Mpồl Lơh kơnòl broă sùm Tỉñ ủy càr dê pơn jat tai jơh nùs lơh ngan bal mờ mpồl kwang đơng lam bồ ală mpồl lơh broă lơh sir jak ngan kơnòl broă geh jàu.