VOV4.K’ho- Nàng kơryan bơta tơnhào bràs mpồn, tàm ală nam do càr Kon Tum neh bơyai lơh tàm pơrlòng giă, ai gơnoar tơnhào gĭt nđờ anih tiah bràs tàm ală dà dờng, dà croh. Bơdìh mờ bơta kwơ geh đơs ngan bơh bơta song dơ pă den tàm uă tiah tơnhào bràs neh gơlik geh bơta lơh tìs lơh bơta ờ suk ơm. Jơnau gơbàn gơlam tus bơta do ngan là broă atbồ tơnhào bràs gơtìp lơh ờ pràn bơh tàm ƀòn lơgar, geh tŭ là geh tềl tơngŏ bơta kơl dang nùs dong kờl, tàm mpồn ai broă lơh tìs do in.

Tiah tơnhào bràs tàm dà dờng Pô Kô, gơl dà hòr gan ƀòn Kà Nhảy, xã Đăk Nông, kơnhoàl Ngọc Hồi geh Ủy ƀan Ñân zân càr Kon Tum ai gơnoar tơnhào bơh nhai 11 nam 2018 ai Kông ty TNHH Một thàñ viên Lĩnh Vũ in. Jat jơnau yal bơh làng bol dê, bơh tŭ ờ hềt geh gơnoar mpồl lơh sa kă bro do neh pơcrì bơcrà ƀồm, jồp bràs, còr, lơ òr is dùl nơm gùng jòng pơgap 100 thơk, jat kềng gah dà dờng Pô Kô lòt gan ù tiah bơh mờr 10 hìu bơnhă làng bol dê gam ngui. Bi Lê Văn Kha ờ dờp broă do den gơtìp ồng A Veo cau tờm tiah jồp bràs hòi cau tus lơh. Bi Kha pà gĭt, broă do tus tŭ do kung gam ờ hềt geh bơsong sơl. Bi Lê Văn Kha đơs: Añ rê añ gŏ dùl nơm gùng bè hơ̆ là añ ai jrong sơn tơ̆p lơh pơng gàr wơl bơnah ù bơh añ dê den là ồng A Veo sồr cau mù lơh añ. Tàm tŭ hơ̆ geh 2 nă kwang bàng sền gŏ broă cau hơ̆ lơh añ, mơya ờ gơtùi yal măt. Añ yal tàm xã, Ủy ƀan xã là dong kờl bơsong jat broă lơh geh kwơ ai ồng A Veo in.

Dùl gơl gùng rơndeh rềp dà dờng Pô Kô bơh Kông ty TNHH Một thàñ viên Lĩnh Vũ còr pơn ring is

Bơh broă lơh tìs ờ geh kơryan tŭ do den geh là cau tàm pơrlòng jai giă bơyai lơh geh ai gơnoar tơnhào bràs, Kông ty TNHH Một thàñ viên Lĩnh Vũ pơn jat tai lơh broă lơh gơrềng tus rài kis làng bol dê, bè: ờ lơh jat di jơnau sồr bè gah tŭ tơngai; broă pơndiang bràs kàl prang den lơh kơmbuh ƀơ̆, kàl mìu den lơh gùng lòt lơmbè. Geh tŭ mpồl lơh sa kă bro do gam pơcrì pơcrà ai ù lŭ bồr rbòng dà yuh dà bơh gùng Hồ Chí Minh dê nàng ƀuơn ai rơndeh dờng in pơndiang bràs lòt rê. Bi Lê Văn Tường hìu rềp gùng pơndiang bràs bơh tiah tơnhào bràs bơh mpồl lơh sa kă bro dê lik tus gùng Hồ Chí Minh, kơlôi sơnơng đơs: Rơndeh dờng lơm, rơndeh 4 kong lòt sùm lơh rơdàng hìu den pơ ùr mờ oh kòn mang bĭc là rơngòt sơl. Den là bơ̆ bơl tiah ơm kis. Hìu añ là til mpồng sùm ờ tŭ lơi khin pờ mpồng. Đah hơđap geh gơl gùng Hồ Chí Minh, lài hơ̆ pơngàr, tŭ do rơndeh dờng mut jồp bràs den pơngàr bơcah tĕ. Pơndiang ù, pơdiang lŭ bồr tơ̆p wơl kàl mìu là dà ờ gơtùi yuh jat gùng rơbòng dà den dà gơguh tih ngơr gan gùng gơ hòr mut tàm hìu añ.

Kông ty TNHH Một thàñ viên Lĩnh Vũ bồr rbòng dà yuh tơlik dà gùng Hồ Chí Minh nàng ƀuơn ai rơndeh in pơndiang bràs lòt rê

Bal mờ gơrềng tus rài kis bơh làng bol dê, tàm dùl tiah tơnhào bràs ndai tàm ù tiah càr Kon Tum dê gam gơlik geh bơta lơh tìs kơn jơ̆ ngan.

Mpờl gŏ ngan là tàm tiah tơnhào bràs, lŭ rơđeh, lŭ tàm dà dờng Đăk Pxi, gơl gơwèt thôn 7, xã Đăk Pxi, kơnhoàl Đăk Hà. Jat Sră ai gơnoar tơnhào phan kwơ tàm ù sồ 898, ngai 15/9/2020 bơh Ủy ƀan Ñân zân càr Kon Tum dê, den Kông ty TNHH Một thàñ viên 87 mìng geh tơnhào mờ broă lơh ƀồm, jồp lơm.

Mơya, mpồl lơh sa kă bro do neh ngui măy mok tờ, bồr is dùl nơm gùng lòt jòng gĭt nđờ rơhiang thơk tam gơl 2 gah dà dờng nàng tờ, jồp bràs lơh tam gơl hiòng dà hòr bơh dà dờng dê. Bơta krơi is ngan là bulah tiah tơnhào bràs mìng ơm ngài mờ Anih lơh broă Ủy ƀan Ñân zân xã Đăk Pxi pơgap rlau 1 kơi sồ lơm, mơya ồng Trần Phước Tuấn, Củ tịc Ủy ƀan Ñân zân xã đơs ngan là ờ sền gŏ bơta lơh tìs lơi. Ồng Trần Phước Tuấn đơs: Tàm xã den sùm đơng lam oh mi là lòt sền, jat sền mờ tŭ do kung ờ hềt sền gŏ bơta lơh tìs lơi sơl

Bè đah Cơl dŭ lơh broă Tài nguyên mờ Môi trường kơnhoàl Đăk Hà, ồng Đinh Khánh Hoàng, Phó kwang atbồ Cơldŭ lơh broă Tài nguyên mờ Môi trường pà gĭt, tàm tiah tơnhào bràs tàm dà dờng Đăk Pxi, gơl gơwèt thôn 7, xã Đăk Pxi, bơh kông ty TNHH Một thàñ viên 87 dê, mpồl lơh broă geh sền gŏ bơta lơh tìs mơya digơlan tài bơh “ơt ơl uă ir” mờ mpồl lơh sa kă bro den Cơldŭ lơh broă mìng ơm wơl tàm broă lơh sră nggal bơto tơngkah lơm. Ồng Đinh Khánh Hoàng đơs: Pơn yơu khi mìng dan kĭ bè, ơ hò, măy jồp tàm tŭ hơ̆ là geh tŭ kung ờ hềt ai măy tờ mù den bol añ kung lơh sră nggal bơto tơngkah uă dơ̆ sơl. Ai geh cau lơh gùng lòt nàng ai rơndeh lòt lơh broă tàm hơ̆ den kung neh đơs tơngkah den kung sồr Ủy ƀan Ñân zân xã lòt sền. Tus tŭ do kung ờ hềt lơh glài cau lơh tìs dơ̆ lơi sơl.

Gùng tàm gùl dà dờng Đăp Pxi bơh Kông ty THH Một thàñ viên 87 dê bơ̆t nàng tơnhào bràs

Tàm tŭ hơ̆, tơnơ̆ lòt sền Sră ai gơnoar tơnhào bràs mờ rùp hin bơh tiah tơnhào bràs dê, ồng Võ Thanh Hải, Phó Kwang atbồ Sở Tài nguyên mờ Môi trường càr Kon Tum neh đơs nền, ală bơta lơh tìs gơlik geh tàm tiah tơnhào bràs là kơn jơ̆ ngan tus khà pal sền sơ wì ai wơl sră ai gơnoar. Ồng Võ Thanh Hải đơs: Tàm jơnau ai ồng geh ƀồm, jồp bràs kung ờ geh ai sơl, ờ geh ai măy mok, hơ̆ là măy tờ tàm dơlam dà dờng nàng ƀồm, jồp bràs kung ờ geh sơl mờ mìng geh ƀồm jồp tàm măy rơkị, bơh măy rơkị jun tus ƀlàng ơn bràs. Lơh gùng tàm dơlam dà dờng gơrềng tus hìong dà hòr kung là neh tìs, do là dơ̆ lơh tìs jơnau yal, sền sơ wì gơrềng tus tiah ơm kis là lơh tìs tàm broă tơnhào phan kwơ tàm ù. Lơh tìs jơh mờ bơta do là pal ai wơl sră ai gơnoar.

Jơnau yal bơh Sở Tài nguyên mờ Môi trường càr Kon Tum pà gŏ, broă tam pà kấp atbồ tơnhào phan kwơ tàm ù là ù tiah càr Kon Tum dê là loh làng ngan. Broă lơh atbồ kung niam ngan sơl. Ngai dơ̆ 4 pah poh, pah nhai mờ pah qúy Ủy ƀan Ñân zân ală kơnhoàl, ƀòn dờng ndrờm pal yal wơl mờ Sở Tài nguyên mờ Môi trường bè broă lơh atbồ bơh tiah do dê. Mơya bơta geh ngan ală bơta lơi gam gơlik geh tàm uă tiah tơnhào bràs tàm ù tiah càr Kon Tum dê pà gŏ, broă atbồ broă lơh tơnhào bràs, bơh jŏ geh tam pà kấp ai ƀòn lơgar in uă tiah gam ờ pràn, geh tŭ là geh tềl tơngŏ kơl dang nùs dong kờl tàm mpồn, ai gơnoar ai broă lơh tìs do in.

Cau cih Khoa Điềm- Cau mblàng K’Hạnh