VOV4.K’ho - Tơngai pa do tàm càr Kon Tum gơlik geh bơta mpồl lơh sa kă bro mờ hìu kă bro bơcri priă lơh Anih kơng Điện tử nàng blơi phan geh lơh bơh broă lơh sa suơn sre. Mùl màl pà gŏ, bơdìh mờ bơta niam dong kờl làng bol, tàm hơ̆ uă ngan là tàm tiah ngài, tiah làng bol kòn cau tăc phan geh lơh bơh broă lơh sa suơn sre den ală Anih kơng Điện tử do gam gơlik geh uă bơta tìs, lơh ờ niam tus mờ broă kă bro mờ lơh ờ sŭk ngan.

Gùng 678 lòt gan 4 xã: Đăk Tờ Kan, Đăk Rơ Ông, Đăk Sao mờ Đăk Na kơnhoàl Tu Mơ Rông, càr Kon Tum jòng mìng 27 kơi sồ, mơya tŭ do geh tus 10 Anih kơng Điện tử blơi phan geh lơh broă bơh lơh sa suơn sre. Tàm hơ̆, mìng is gơl gùng gơwèt xã Đăk Rô Ông tơrgùm uă ngan mờ 5 Anih kơng. Ồng Ngụy Đình Phúc, Kwang atbồ Mpồl atbồ drà kă bro sồ 2, Đah Atbồ drà kă bro càr Kon Tum pà git, sền tàm mùl màl pà gŏ ală anih kơng Điện tử blơi phan geh lơh bơh broă lơh sa suơn sre do ndrờm geh tìs: “Lài ngan là ală Anih kơng Điện tử, ală cau do ngui kơng ờ geh tem lir phan kă bro mờ sền nàng git jăt mờ kơrnoăt geh ai. Tàm ală anih blơi phan geh lơh bơh broă lơh sa suơn sre ờ geh lir khà priă jăt mờ kơrnoăt geh ai den là khà priă bơh ală Anih kơng geh gơtìp ờ ndrờm bal, den tàng làng bol gơtìp hoàc huơr tŭ tăc phan geh lơh bơh broă lơh sa suơn sre bè bùm blàng. Bol añ pin pơrdah ngan bè bơta niam bơh kơng ờ tơl bơta niam do”.

Anih Kơng điện tử tàm thôn Mo Bành, xã Đăk Rơ Ông geh crăp lơh tàm bă ù lời ai gùng ù gờl in

Bal mờ ală bơta tìs tàm gah kă bro bè: ờ geh sră kă bro; kĭ ờ geh lir phan kă bro; ờ tơl mờ ờ geh sră nggal Anih kơng, kă bro ờ di anih geh ai, ờ lir khà priă blơi... 10 anih kơng Điện tử blơi phan geh lơh bơh broă lơh sa suơn sre tàm gơl gùng 678 lòt gan 4 xã bơh kơnhoàl Tu Mơ Rông gam geh ală bơta tìs bè: pờ gùng tơrbŏ bal broă lơh tìs tus mờ gùng tờm, lơh tiah ờ do ờ dă gùng ù gờl crăp Anih kơng Điện tử, lơh hìu ơm tàm bă ù geh ai nàng lơh gùng. Ồng Nguyễn Thái Hoàng Anh, kwang lơh broă tàm gah Thanh tra, gơwèt Sở Giao thông Vận tải càr Kon Tum pà git: “Broă sơnrờp ngan là pờ gùng tơrbŏ ờ di tàm gùng tờm mờ ờ geh broă ai lơh bơh anih lơh broă geh gơnoar. Broă do geh lơh gơtìp ală bơta ờ niam gùng lòt tàm anih mờ anih kơng do pờ gùng tơrbŏ bal. Bơdìh hơ̆ tai, broă do kung pal đơs loh tai dùl bơta là tàm bơta geh ai sră kă bro ờ geh broă ndrờm bal. Di ngan là lài mờ tŭ geh sră dan kă bro den bi pal geh sră ai tơrbŏ bal, den do lơh sơlơ̆u wơl den tàng tŭ do lơh gơtìp ală bơta bè do”.

Jăt khà kờp bơh anih lơh broă geh gơnoar tàm kơnhoàl Tu Mơ Rông pà gŏ, tàm kơnhoàl tŭ do geh 15 anih kơng Điện tử blơi phan geh lơh bơh broă lơh sa suơn sre, mìng là blơi phan bơh làng bol lơh geh. Bơdìh mờ bơta niam là dong kờl làng bol, tàm hơ̆ uă ngan là tàm tiah ngài, tiah làng bol kòn cau tăc phan geh lơh bè bùm blàng den ală anih kơng phan do kung geh uă bơta tìs, lơh ờ niam tus mờ broă kă bro mờ lơh gơtìp ờ sŭk tàm làng bol. Mùl màl bè pơrlồm bơta ñjơ̆; kờp bơnah rơhiang phan siồ siă lơh gơtìp hoàc huơr tus mờ làng bol; lơh ờ loh làng nàng rồn bơklơn khà priă blơi (tàm tŭ hìu măi blơi geh bơh 2 rơbô 300 tus 2 rơbô 400 đong tàm 1 kơng bùm ris den ală anih kơng do blơi mìng geh bơh 1 rơbô 800 tus 2 rơbô đong tàm 1 kơng mờ geh tŭ ờ uă rơlao)... Tềng đăp mờ broă ală Anih kơng Điện tử blơi phan geh lơh bơh broă lơh sa suơn sre tàm kơnhoàl geh uă bơta tìs, lơh ờ niam tus mờ broă kă bro mờ bơta lơngăp lơngai ờ do ờ dă tàm ƀòn ơm kis, ồng Phạm Xuân Quang, Phó Củ tịc UɃÑZ kơnhoàl Tu Mơ Rông pà git, gơnoar atbồ kơnhoàl kung neh geh jơnau đơng lam bè broă do: “Kơnhoàl kung neh tơnguh jơnau đơng lam ală xã atbồ nền nòn ờ ai ală anih kơng gơlik geh tai. Mờ ală anih kơng kơnhoàl neh ai gùng dà broă lơh den sồr ală anih kơng gờñ lơh gơs sră nggal di jăt mờ kơrnoăt geh ai, mờ lơh jăt ală kơrnoăt tàm adăt boh lam. Gam mờ ală anih kơng tìs den bol añ kung neh geh jơnau mờ đah Thanh tra giao thông gơrềng bal tus mờ broă tơrbŏ. Hơ̆ sồng bơta niam kơng di pal bè khà priă mờ bol añ neh lơh broă mờ atbồ drà kă bro bal mờ đah was bơta niam bơh Sở Khoa học nàng atbồ, sền gròi”.

Lòt sền gŏ jơh ală Anih Kơng điện tử ndrờm lơh tìs lơm

Tàm 10 kơnhoàl, ƀòn dờng bơh càr Kon Tum, mìng kờp tàm 2 kơnhoàl Tu Mơ Rông mờ Đăk Tô tŭ do neh geh 32 Anih kơng Điện tử blơi phan geh lơh bơh broă lơh sa suơn sre. Cồng nha broă sền ing bơh Mpồl atbồ drà kă bro sồ 2, đah Atbồ drà kă bro càr Kon Tum, Sở Khoa học mờ Kông nghệ bal mờ ală gah lơh broă geh gơnoar 2 kơnhoàl do pà gŏ, jơh ală anih kơng Điện tử mpồl lơh sa kă bro mờ hìu kă bro crăp ndrờm ờ di mờ kơrnoăt geh ai. Mờ kung tài ờ lơh jăt niam broă atbồ bơh sơnrờp den tàng gơtìp tus mờ broă ală Anih kơng Điện tử blơi phan geh lơh bơh broă lơh sa suơn sre neh gơtìp uă bơta ờ niam tàm gah kă bro mờ tàm bơta lơngăp lơngai ờ do ờ dă tàm ƀòn lơgar, den tàng pal geh lơh niam wơl mơ.

Cau cih Khoa Điềm-Cau mblàng Ndong Brawl