VOV4.K’ho- Tàm 2 ngai (24 mờ 25/04), Mpồl lơh broă bơh Ủy ƀan Jơi bơtiàn kòn cau bơh ồng Hầu A Lềnh, Ủy viên Đảng Dà lơgar, Ƀộ trưởng, Kwang ătbồ Ủy ƀan Jơi bơtiàn kòn cau lơh kwang ătbồ mpồl neh lơh broă mờ càr Kon Tum bè cồng nha lơh jăt broă lơh jơi bơtiàn kòn cau; Broă lam lơh jăt Broă lơh jơnau kờñ dà lơgar bơtàu tơnguh lơh sa- mpồl bơtiàn tiah làng bol jơi bơtiàn kòn cau dùl êt nă cau mờ tiah kơh bơnơm, tơngai dơ̆ 1 bơh nam 2021- 2025 tàm ù tiah càr Kon Tum.

Gùt anih dơ̆ lơh broă

Càr Kon Tum geh khà kờp làng bol rlau 568 rbô nă bal mờ 43 jơi bơtiàn kòn cau; làng bol jơi bơtiàn kòn cau dùl êt nă cau geh rlau 54,9%. Bulah pah nam càr gơmù geh bơh 3 tus 4% hìu bơnhă rƀah, mơya tus lồi nam 2021 càr kung gam sơl mờr 22 rbô hìu bơnhă rƀah, geh tus mờr 16% pơndrờm mờ kờp jơh khà hìu làng bol tàm gùt càr, tàm hơ̆ hìu jơi bơtiàn kòn cau dùl êt nă cau là hìu rƀah geh tus rlau 94%.

Ồng Hầu A Lềnh đơs tàm dơ̆ lơh broă

Đơs tàm dơ̆ lơh broă, Ƀộ trưởng, Kwang ătbồ Ủy ƀan Jơi kòn cau ồng Hầu A Lềnh tơngkah, tàm broă lơh jăt Broă lơh jơnau kờñ dà lơgar bơtàu tơnguh lơh sa- mpồl bơtiàn tiah làng bol jơi bơtiàn kòn cau dùl êt nă cau mờ tiah kơh bơnơm, càr Kon Tum pal rơcăng lài ală gùng dà lam lơh jăt. Bal mờ broă lam lơh jăt Broă lơh jơnau kờñ nam 2022 càr kung pal rơcang lài gùng dà tam pà priă jền ai nam 2023 in. Ƀộ trưởng ồng Hầu A Lềnh kung sồr càr Kon Tum sền gròi bơtơl mpồl kwang bàng lơh broă lơh jơi bơtiàn kòn cau êt ngan rlau jơh là tơl jăt di jơnau sồr bơh kơrnoăt boh lam dê.

Cau mblàng Lơ Mu K’Yến