Jat jơnau đơs bơh Liên đoàn kă bro mờ lơh sa mờ măi mok Việt Nam dê, broă lơh tam gơl wơl sră pơ àr gơnoar atbồ dà lơgar, lơh niam wơl anih bơcri priă kă bro bơh càr Kon Tum dê tàm tơngai lài lơh geh uă cồng nha. Pơn rơ ngan là Khà pràn jak tàm pơrlòng kâp càr gơguh 24 khà sap sèng ơm dơ̆ 37 tàm 63 càr, ƀòn dờng; Khà tơlir kâp càr ơm dơ̆ 26 tàm 63 càr, ƀòn dờng; Khà lơh tam gơl wơl sră pơ àr gơnoar dà lơgar gơguh 4 khà ơm dơ̆ 55 tàm 63 càr, ƀòn dờng… Git nền lơh tam gơl wơl sră pơ àr gơnoar atbồ dà lơgar, lơh niam wơl anih bơcri priă, kă bro là broă lơh tam gơl pràn, là broă lơh tờm khà dùl nàng lam lơh geh cồng nha ală jơnau kờñ, broă geh jàu bè bơtàu tơnguh lơh sa- mpồl bơtiàn tơngai bơh nam 2020 tus nam 2025.

Tàm pơrjum, ồng Lê Ngọc Tuấn, Củ tịc Ủy ƀan Ñân zân càr Kon Tum sồr lam lơh 6 mpồl broă lơh nàng bơsong ală bơta ờ niam, tàm hơ̆ tơrgùm lơh gơlik bơta tam gơl pràn tàm drơng broă làng bol mpồl lơh sa kă bro; tơnguh jơnau git wă bè bơta kuơ, gơnoar broă bơh broă lơh lơh niam anih bơcri priă, kă bro, tơnguh pràn jak tàm pơrlòng gơ wèt mờ bơta bơtàu tơnguh lơh sa mpồl bơtiàn; kờp sền, geh jơnau dan koh tơrmù, lơh ƀuơn ală jơnau sồr gơ rềng tus broă lơh bơcri priă, kă bro.