VOV4.K’ho - UɃÑZ càr Kon Tum pa bơyai lơh pơrjum ƀăo yal bè broă lơh jăt jơnau đơs pơn dŭt sồ 222 ngai 18 nhai 02 nam 2022 bơh Thanh tra Cíñ phủ. Ồng Nguyễn Hữu Tháp, Phó Củ tịc UɃÑZ càr Kon Tum pà git: UɃÑZ càr neh đơng lam ală mpồl lơh broă, ală tiah gơrềng bal mhar sền wơl, lơh jăt broă tơmù ală bơta ờ niam, ờ pràn mờ Thanh tra Cíñ phủ neh ai geh.

                                                                  Dơ̆ pơrjum ƀăo

Gơwèt mờ ală bơta tìs tàm broă atbồ ngui ù; Broă atbồ bơcri priă bơ̆t bơtàu; Rơndăp broă bơ̆t bơtàu, rơndăp broă ai khà ù tiah lơh ƀòn drà... mờ Thanh tra Cíñ phủ neh geh jơnau đơs pơn dŭt, UɃÑZ càr Kon Tum geh đơng lam ală mpồl lơh broă, ală tiah gơrềng bal lơh jăt nền nòn, gàr niam di jăt mờ kơrnoăt geh ai tŭ do. Bè broă lơh geh kwơ is khà măt kă bro kơnuh sơnơm Ngọc Linh, kwang đơng lam Sở Nông nghiệp mờ Phát triển Nông thôn càr Kon Tum pà git, tŭ do geh uă mpồl lơh broă, cau dùl nă să is ai khà măt kă bro kơnuh sơnơm Ngọc Linh Kon Tum nàng tăc phan tàm drà kă bro mờ tàm internet. Càr geh bơyai lơh sền wơl mờ lùp sền nàng tơmù bơta do.

Cau mblàng Ndong Brawl