VOV4.K’ho- Tơngkah 50 nam ngai tam lơh pha lin Đăk Tô- Tân Cảnh, ngai 24/4, Ƀộ Quôk phòng geh đơng lam, pơgồp bal mờ Tỉñ ủy Kon Tum bơyai lơh Pơrjum mờ tơngume “Tam lơh pha lin Đăk Tô- Tân Cảnh”.

Pơrjum nàng kờñ ai gŏ bơta kuơ dờng màng bơh tam lơh pha lin Đăk Tô- Tân Cảnh dê gơ wèt tus mờ dơ̆ tam lơh đah tô Tây Nguyên mờ bơta bơtàu tơnguh pal geh bơh dơ̆ tam lơh dră wơl bol sò tơm Mỹ, tơngklàs dà lơgar dê tàm ù tiah tam lơh Tây Nguyên. Lơh tềl bơta tam gơl bè bơta chài lam lơh, đơng lam mờ lam lơh tam lơh, pơgồp bơnah tàm pha lin bơh dơ̆ tam lơh kuơmàng nam 1972 dê. Pơrjum tơrgùm ai geh ală jơnau bơsram kah yau mờ mờng chài kuơmàng tàm broă đơng lam, pơlam bơh Đảng dà lơgar, Quân ủy dà lơgar, Ƀộ Quôk phòng dê bè broă sền sơ wì jŏ jòng, niam chài lam lơh tam lơh, broă lơh pơgồp bal tam lơh ală mpồl ling; broă pơgồp bal đah mpồl ling tờm mờ mpồl ling bal mờ làng bol Kon Tum, ù tiah Tây Nguyên. Bơh hơ̆, lơh jat mờ ngui sùm tàm broă lơh bơt bơtàu mờ sền gàr dà lơgar.

Cau mblàng K’Duẩn