VOV4.K’ho- Mpồl lơh broă geh gơnoar kơnhoàl Kon Plông, càr Kon Tum gam mhar lùp khàu dùl dơ̆ mus kơl brê pa gŏ tàm thị trấn Măng Đen. Jơnau yal bơh sơnrờp geh gĭt broă do geh Ủy ƀan Ñân zân thị trấn Măng Đen gŏ tàm ngai 03/03/2022 tàm bă 2 mờ bă 3, anih 11, tiah brê dềt 486, bă brê do gơwèt bơta ătbồ bơh Ủy ƀan Ñân zân thị trấn Măng Đen dê.

Tiah mus kơl brê

Tus ngai 08/03/2022, ală mpồl lơh broă geh gơnoar bơh kơnhoàl Kon Plông dê neh tus sền tiah mus kơl brê mờ gĭt nền geh 26 tờm chi gơtìp koh kơl, gơwèt ală bơta chi: Xoan mộc, Mhàm so, Ƀời lời rơmĭt, Xoan ha gơwèt mpồl V mờ VI. Ơnàng măt tờm ală bơta chi gơtìp mus kơl bơh 30 phơng tus 80 phơng. Tơl tờm chi bol mus kơl brê mìng koh ai bơnah tờm dờng ngan rlau jơh rềp tềng nggu, bơnah dơm chi gam wơl sơrbì tàm anih mus kơl. Tềl hoài dơm chi jăt bơta gĭt nền bơh sơnrờp rê hờ đah kơnhoàl Kon Rẫy. Tŭ do, dơ̆ mus kơl brê gam geh anih lơh broă kảñ sát lùp khàu kwang àng kơnhoàl Kon Plông mờ Hạt Kiểm lâm kơnhoàl Kon Plông, càr Kon Tum mhar lùp khàu lơh loh.

 Cau mblàng Lơ Mu K’Yến