Rơndap broă lơh Anih sưon dờng ròng sur lơh gơs phan tac bro ngui kông nghệ kao mờ suơn chi bơrlŭ bal gam geh Kông ty Kổ phần Thiên Thành Tài lam lơh tàm thôn Khơk Klong, xã tiah nhàr dà lơgar Rờ Kơi, kơnhoàl Sa Thầy, càr Kon Tum. Jat kwang đơng lam bồ Kông ty do yal, rơndap broă lơh geh lam lơh tàm bă ù ơnàng rlau 21 lồ, kờp jơh priă bơcri 165 tơmàn đông. Jơnau kờñ bơh rơndap broă lơh dê là pah nam ròng 2 dơ̆ sur poac kờp jơh geh 48 rbô nơm. Bal mờ hơ̆ là lơh niam phan ƀơ̆ tuh tơlik, tam chi bơrlŭ bal mờ priă jền lơh geh kờp dŭ pah nam geh mờr 300 tơmàn đông mờ ai geh broă lơh mờr 100 nă cau lơh broă in. Ồng Phạm Văn Thành, Củ tịc Mpồl duh broă đơng pơlam Kông ty Kổ phần Thiên Thành Tài pà git, tàm jơh gùt tŭ tơngai lam lơh rơndap broă, Kông ty sùm dờp geh bơta dong kờl uă ngan bơh gơnoar atbồ mờ gah lơh broă geh gơnoar càr Kon Tum dê: “Bol hi lơh nền bơcri priă tàm anih do geh bơta dong kờl uă ngan bơh Ủy ƀan Ñân zân càr Kon Tum dê kung bè Ủy ƀan Ñân zân kơnhoàl Sa Thầy dê neh lơh gơlik bơta niam ai Kông ty in tàm tŭ lòt sền, rơ wah anih lơh broă kung bè tàm broă ai ù lơh rơndap broă. Dơ̆ 2 là ală sở, mpồl, gah broă lơh kung neh lơh gơlik bơta niam ai Kông ty in tàm broă lơh gơs ală sră nggal nàng Kông ty gơtùi lam lơh tàm tơngai mhar ngan rlau jơh”.

Nàng gơ hòi gơ jà ală cau bơcri priă, lơh gơlik priă jền ai bơtàu tơnguh lơh sa- mpồl bơtiàn in, tơnơ̆ Pơrjum dờng Đảng ƀộ càr Kon Tum dơ̆ XVI tàm nhai 9 nam 2020, càr Kon Tum tơrgùm lơh niam anih bơcri priă, sơlơ tơnguh broă yal tơnggit jơnau bè ală rơndap broă pa, hòi jà bơcri priă mờ rơcang lài lòt bal mờ mpồl lơh sa kă bro. Nàng lơh niam, bơsong di tŭ ală kòl yan bơh cau bơcri priă dê, Ủy ƀan Ñân zân càr Kon Tum gàr sùm broă lơh “Kơphe mpồl lơh sa kă bro, cau lơh sa kă bro” tàm poh nggùl pah nhai; bơyai lơh “Pơrjum tìp mat tơm bơh bơr mờ mpồl lơh sa kă bro” dùl nam 2 dơ̆. Bal mờ kâp càr, tàm 2 tiah lơh sa tờm, gơnoar atbồ ƀòn dờng Kon Tum mờ kơnhoàl Kon Plông kung gàr sùm uă broă lơh tìp mat, tàm pơ gơl cribơyai broă, dong mpồl lơh sa kă bro tus jòi git bè tŭ niam bơcri priă kung bè lơh sa, kă bro. Ồng Nguyễn Thanh Mân, Củ tịc Ủy ƀan Ñân zân ƀòn dờng Kon Tum pà git: “Tŭ ală cau bơcri priă tus kơlôi sơnơng den ƀòn dờng geh là anih tờm nàng tàm tơrbŏ wơl ală broă mờ cau bơcri priă sền gròi, pơn yơu bè yal tơnggit ù tiah, yal tơnggit rơndap tap sèng ală sră nggal. Ƀòn dờng kung bal mờ ală sở, gah broă lơh lam lài nàng ai tơlik jơnau đơs Ủy ƀan Ñân zân càr in lơh gơlik bơta ƀuơn ngan rlau jơh cau bơcri priă in. Dilah cau bơcri priă geh bơta kal ke lơi den ƀòn dờng geh là cau sơn rờp bơsong kal ke, ờ lời cau bơcri priă pal lòt jòi git is”.

Mờ uă broă lơh jơh nùs, tơnơ̆ rlau 2 nam lơh jat Nghị quyết Pơrjum dờng dơ̆ XVI Đảng ƀộ càr, Kon Tum neh gơ hòi gơ jà geh 68 rơndap broă lơh bơcri priă mờ kờp jơh priă bơcri cih tàm sră rlau 18 rbô tơmàn đông. Pal gròi sền là ờ mìng tàm tiah ƀuơn ƀuài, bal mờ tàm ală kơnhoàl tiah sar lơgar ngài, tiah jơi bơtiàn kòn cau dùl êt nă cau gam uă kal ke bè Tu Mrông, Đăk Tô, Sa Thầy… kung gơ hòi gơ jà geh cau bơcri priă mờ uă rơndap broă lơh neh lam lơh tàm ù tiah ngan ngồn. Mò Huỳnh Thị Thúy Hà, Phó Kwang atbồ Sở Kế hoạc mờ Đầu tư càr Kon Tum pà git, càr gam pơn jat tai hòi jà ală cau bơcri priă tàm uă gah, bè: lơh gơlik sơnơm tơmba, lơh sa mờ măi mok, năng lượng lơh geh wơl, nhơl chờ, lơh sa suơn sre ngui kông nghệ kao… Mờ nàng Kon Tum in gơ gơs là anih tus bơh ală cau bơcri priă dê, càr gam jơh nùs lơh niam anih bơcri priă, kă bro: “Càr git nền broă tam gơl anih bơcri priă, kă bro, dong kờl mpồl lơh sa kă bro là dùl tơngume kuơmàng nàng gơ hòi gơ jà bơcri priă, bơtàu tơnguh lơh sa- mpồl bơtiàn càr dê. Càr sền gròi sơlơ tơnguh broă lơh niam sră nggal hàñ cíñ. Ală kâp, ală gah broă lơh sơlơ tơnguh mhar broă bơsong sră nggal hàñ cíñ gơ wèt mờ ală rơndap broă lơh neh geh gùng dà bơcri priă nàng ală mpồl lơh sa kă bro gờñ lam lơh rơndap broă di tŭ mờ geh cồng nha. Jơh nùs lơh gơlik bơta ƀuơn gơ hòi gơ jà ală cau bơcri priă dờng geh pràn jak, jơh nùs tàm càr”.

Nàng bơt bơtàu anih bơcri priă ring bal, loh làng, di mờ adat boh lam, càr Kon Tum tŭ do kung gam kràñ cê bơsong ală bơta ờ niam tàm ală rơndap broă mờ cau bơcri priă ờ lam lơh di mờ jơnau hơ pơrgon. Mờ kung kràñ cê lơh glài kràñ ală cau dùl nă să, mpồl bal geh broă lơh pơhì pơhà, lơh gơbàn kal ke tŭ cau bơcri priă tus jòi git, lùp sền mờ bơcri priă tàm càr.