VOV4.K’ho- Mờ nùs nhơm lòt bal mờ cau lơh sa kă bro, mpồl lơh sa kă bro, Ủy ƀan Ñân zân càr Kon Tum pa bơyai lơh Pơrjum tìp măt tơm bơh bơr mờ mpồl lơh sa kă bro. Rlau 10 jơnau đơs tơn mờ 32 jơnau đơs pơyua mờ sră pơ àr tus mờ Kwang đơng lam bồ Ủy ƀan Ñân zân càr Kon Tum in tàm dơ̆ tìp măt tơm bơh bơr pà gŏ, mpồl broă mờ ală mpồl lơh sa kă bro gam lơh sa mờ kă bro tàm càr Kon Tum gam tìp là broă lơyài tàm broă kĭ rơndăp ù tiah bal mờ ală bơta gơkòl kòl yan gơrềng tus ù tiah. Bal mờ hơ̆, ală bơta gơkòl gơlik geh tàm ală tŭ lòt sền, apah brê nàng tam tờm chi lơh sơnơm mờ bơtàu tơnguh nhơl chờ ƀòn brê bơnơm kung lơh bàr pe rơndăp broă lơh tìp kal ke, lơyài tŭ tơngai lơh. Mpồl ală cau lơh sa kă bro kơnòm să càr Kon Tum kung geh 11 jơnau đơs mờ Ủy ƀan Ñân zân càr Kon Tum. Tàm hơ̆, ai lài khà dùl nàng tă bơsong kal ke ai mpồl lơh sa kă bro in là priă bơtàu tơnguh wơl mờ bơtàu tơnguh lơh sa. Mơkung dong kờl, ai tơl bơta nàng mpồl lơh sa kă bro in ƀươn ƀoài tàm broă geh apah ù tiah nàng bơcri priă bơtàu tơnguh lơh sa kă bro.

Ồng Nguyễn Ngọc Sâm, Phó Củ tịc Ủy ƀan Ñân zân càr Kon Tum hơ jơnau lùp bơh mpồl lơh sa kă bro dê gơrềng tus tơngume rơndăp ù tiah ngui ù

Cih dờp ală jơnau đơs, jơnau sồr bơh mpồl lơh sa kă bro, cau bơcri priă dê, kwang đơng lam bồ càr Kon Tum sồr ală sở, iăt kơno, săc rwah ală jơnau đơs, jơnau sồr bơh mpồl ală mpồl lơh sa kă bro dê nàng dan ai lơh jăt ală kơrnoăt boh lam, gùng dà broă lơh gơwèt gơnăp gơnoar; tơrgùm mờ yal mờ Dà lơgar in bàr pe broă mờ mpồl lơh sa kă bro lùp, sồr dong kờl mpồl lơh sa kă bro sơrlèt gan kal ke, bơtàu tơnguh wơl lơh sa, kă bro, wèt tus jơnau kờñ bơtàu tơnguh kơ̆ kơl jăp.

Cau mblàng Lơ Mu K’Yến