Tàm dơ̆ lơh broă, kwang đơng lam bồ càr Kon Tum bal mờ ală sở, gah broă lơh geh gơnoar neh dờp uă jơnau yal gơ rềng tus kal ke, kòl yan pal bơsong bơh cau tờm rlau 10 mpồl lơh sa kă bro dê, uă ngan là tàm gah bơcri priă lơh hìu măi pờ tơlik ồs đèng dà mờ tơnhàu phan kuơ tàm ù. Ồng Nguyễn Ngọc Sâm, Phó Củ tịc Anih duh broă làng bol càr Kon Tum neh hơ tơn gơ wèt mờ tơl broă, tơl bơta kòl yan mùl màl.

Gơ wèt mờ ală tơngume geh jơnau dan mờ ờ hềt gơtùi bơsong tơn, Phó Củ tịc Anih duh broă làng bol càr Kon Tum ồng Nguyễn Ngọc Sâm jàu ală sở, gah broă lơh bal mờ bàr, pe kơnhoàl tơrgùm dong kờl mpồl lơh sa kă bro bè broă rơndap lơh, sră nggal nàng tă bơsong kal ke, kòl yan mờ geh tŭ tơngai mùl màl hơ mpồl lơh sa kă bro in.