Dơ̆ mblàng yal Jơ Plai ù nam 2023 bơh Đoàn Kông ty ồs đèng càr Kon Tum bơyai lơh neh gơ hòi gơ jà bơta tus bal bơh rlau 900 nă kơnòm bơsram hìu bơsram kâp 1- kâp 2 Đăk Blà, ƀòn dờng Kon Tum. Bơta niam ngan là jơh ală jơnau lùp tàm bơnah hơ geh phan ƀàn gơ rềng tus bơta tềm pềr đèng, bè: ngui tềm pềr ồs đèng tàm ơdŭ bơsram, hìu bơnhă; đal git phan bơna đèng ngui uă đèng; rơ wah ngui phan bơna tềm pềr đèng… ală kơnòm bơsram ndrờm hơ di mờ loh làng ngan. Oh Chu Thị Thanh Tuyền, kơnòm bơsram ơdŭ 9D pà git: “Tơnơ̆ broă lơh do oh neh git loh rlau tai bè bơta kuơ bơh Jơ Plai ù dê nàng tềm pềr ồs đèng, sền gàr tiah ơm kis bơh bơta tam gơl trồ tiah. Oh geh ală broă lơh nàng tềm pềr ồs đèng pơn yơu bè tàm hìu bơsram halà tŭ tàm hìu den gơ sơt ală phan ngui đèng tŭ ờ ngui, halà tŭ lik bơh cơldŭ bơsram den pal gơ sơt đèng, gơ sơt quạt, tivi. Oh kơp kờñ là ală broă lơh dềt rơ hền hơ̆ rơp pơgồp bơnah tàm sền gàr tiah ơm kis bơh tam gơl trồ tiah”.

Mờ gơnoar broă lơh tờm, gah ồs đèng càr Kon Tum neh geh uă broă lơh mblàng yal, hòi jà rềp mềr mờ làng bol. Nam do, git nền cau kờñ mblàng yal jơnau là ală kơnòm bơsram, gah ồs đèng neh pơgồp bal mờ hìu bơsram lơh ală dơ̆ tơm bơh bơr bơdìh tŭ jơ bơsram ai ală oh in. Bal mờ hơ̆ là mblàng yal mờ pano, áp phích, băng rôn… mờ tàm pang web, mạng xã hội, pang fanpage. Cơldŭ kă bro kông ty pơgồp bal mờ Đoàn ơruh pơnu pơgồp bal lam lơh broă lơh “Lòt bal mờ oh tus hìu bơsram” pơgồp bal mblàng yal Broă lơh Jơ Plai ù nam 2023. Tơl broă tàm broă lơh ndrờm lơh gơ rề pràn ngan jơnau kờñ pơyua “Tềm pềr ồs đèng- Gơ gơs mờng kwèng”. Ồng Nguyễn Quang Hùng, Phó Kwang atbồ Kông ty ồs đèng Kon Tum pà git, Kông ty kờñ lơh gơ rề uă bơta kuơmàng bơh broă lơh “Tềm pềr ồs đèng- Gơ gơs mờng kwèng” tus rềp rlau tàm làng bol, ngan là ală kơnòm bơsram. Bơh hơ̆ lơh gơ rề uă jơnau kờñ pơyua do tus hìu bơnhă, gơp bơyô, cau tờm mờ rlau mờ hơ̆ tai là jơh gùt mpồl bơtiàn. Bơh ală broă lơh mblàng yal jơnau, neh geh ală tam gơl niam tàm jơnau git wă kung bè broă lơh bơh làng bol dê bè ngui đèng tềm pềr nàng sền gàr tiah ơm kis rơcang sơndră tam gơl trồ tiah: “Mblàng yal tềm pềr ồs đèng kung bè lơh jat broă lơh Jơ Plai ù là broă lam lơh sùm. Kông ty ồs đèng Kon Tum kơlôi sơnơng ală broă lam lơh nàng ƀuơn gơ mut tàm jơnau git wă bơh làng bol dê, geh uă broă lơh krơi is tàm tơl bă tiah. Ală hìu bơnhă làng bol kung bè ală mpồl lơh sa kă bro tŭ do kung gam tơrgùm tàm broă lơh tềm pềr ồs đèng nàng tơnguh cồng nha lơh bro bơh ală mpồl lơh sa kă bro dê”.

Bơh broă lơh Jơ pai ù nam 2023, khà ồs đèng tềm pềr geh bơh càr Kon Tum dê là 2 rbô 400 kWh. Bơta do ai gŏ bơta gơ rề pràn ngan bơh ală broă lơh tàm Broă lơh Jơ Plai ù nam 2023 dê. Mờ bơta pal chờ hờp là broă lơh tềm pềr ồs đèng ờ mìng ơm wơl tàm tŭ jơ dùl jơ mang ngai dơ̆ 7, poh lồi nhai 3 pah nam geh lơh Broă lơh Jơ Plai ù, mờ gơ gơs broă lơh sùm pah ngai.