VOV4.K’ho- Jơnau yal bơh Ci kụk Kiểm lâm càr Kon Tum drim ngai 09/9 pà git, Hạt kiểm lâm kơnhoàl Sa Thầy neh yă broă mus kơl brê tìs mờ adat boh lam gơlik geh tàm kơnhoàl.

Tiah gơlik geh broă mus kơl dơm chi tìs mờ adat boh lam

Tơnơ̆ tŭ geh kơrnuat yă broă lơh tìs hìñ sự bè “tìs lơh tìs jơnau cih bè mus kơl, sền gàr brê mờ chi brê”, Hạt kiểm lâm kơnhoàl Sa Thầy neh jun sră nggal tus anih kảñ sát lùp khàu, kwang àng kơnhoàl Sa Thầy nàng pơn jat tai lùp khàu, lơh glài jat di jơnau cih bơh adat boh lam dê. Broă lơh tìs geh git gŏ tàm bơnah brê bơh Kông ty TNHH MTV Lâm nghiệp Sa Thầy atbồ gơ wèt ù tiah xã tiah nhàr dà lơgar Mô Rai, kơnhoàl Sa Thầy.

Dùl tờm chi gơtìp òt pừ

Tiah gơlik geh broă mus kơl dơm chi tìs mờ adat boh lam kal ke ngan, ơm ngài ƀòn làng bol ơm kis mờ ngài gùng dờng 14C mờr 10 kơi sồ. Tàm tơngai git gŏ broă lơh tìs tàm ngai 02/9/2022, mpồl sền gàr brê bơh Kông ty TNHH MTV lâm nghiệp Sa Thầy dê git gŏ geh 32 tờm chi gơtìp mus kơl mờ kơn jơ̆ dơm chi pơgap rlau 40 khối, geh ală bơta dơm chi bơh mpồl 3 tus mpồl 8.

Cau mblàng K’Duẩn