Nàng kờñ yal tơngĭt, tàm tơn tìp bal cau jòi cau lơh broă mờ cau kờñ geh broă lơh; lơh geh tŭ niam nàng cau lơh broă, ơruh pơnu in geh gĭt wil tơl, di tŭ jơnau yal tơngĭt jơnau drà lơh broă nàng bơh hơ̆ săc rwah geh broă lơh dipal, ngai 17/05, tàm ƀòn dờng Kon Tum, Sở Lao động, Thương ƀiñ mờ Xã hội pơgồp bal mờ Tỉñ đoàn Kon Tum bơyai lơh Ngai broă lơh nam 2023 gơhòi gơ jà gal ngan cau lơh broă geh jơnau kờñ jòi broă lơh.

Tàm Ngai broă lơh nam 2023, geh 37 anih, mpồl lơh sa kă bro cih mat geh jơnau kờñ jòi cau lơh broă bal mờ rlau 3 rbô 200 broă lơh tàm càr, bơdìh càr mờ lòt lơh broă geh tơngai pơrgon tàm lơgar ndai. 12 anih, mpồl lơh sa kă bro tus bal sac rwah tơn tàm Ngai broă lơh ndrờm geh bơngă pin dờn, lơh broă kă bro geh cồng nha, geh broă dong kờl priă nhai mờ ală priă dong kờl niam ai cau lơh broă in.

Tàm Ngai broă lơh càr Kon Tum nam 2023, ală anih, mpồl lơh sa kă bro geh jơnau kờñ jòi cau lơh broă neh wă rò, yal tơngĭt, bơto pơlam broă lơh ai pơgăp 700 nă cau lơh broă, cau bơsram dờng mờ đoàn viên ơruh pơnu dê. Càr Kon Tum geh jơnau kờñ tàm nam 2023 ai geh broă lơh ai rlau 6 rbô nă cau lơh broă in, tàm hơ̆ geh 100 nă cau lơh broă lòt lơh broă tàm lơgar ndai.