VOV4.K’ho- Di tơngkah kir sơnrai 50 nam tam lơh pha lin Đăk Tô- Tân Cảnh (24/04), tàm Ƀlàng dờng 24/04 tàm thị trấn Đăk Tô, kơnhoàl Đăk Tô, Tỉñ ủy, Hội đồng Ñân zân, Ủy ƀan Ñân zân, Ủy ƀan Mặt trận dà lơgar Việt Nam càr Kon Tum neh yŭ rơyùm bơyai lơh Dơ̆ tơngkah kir sơnrai 50 nam tam lơh pha lin Đăk Tô- Tân Cảnh mờ dờp rò Ƀằng săp sèng tiah tềl lời wơl Dà lơgar dờng màng tiah tềl lời wơl jơnau kah yau Tiah jơnhoa 1015 mờ Tiah jơnhoa 1049.

Anih bơyai lơh dơ̆ tơngkah kir sơnrai

Lơh jăt nùs nhơm tam lơh pha lin Đăk Tô- Tân Cảnh, 50 nam do, Đảng ƀộ, gơnoar ătbồ, ling klàng mờ làng bol ală jơi bơtiàn kơnhoàl Đăk Tô đơs is, mờ càr Kon Tum đơs bal sùm tam klăc, ring bal, tơrgùm bal lam lơh jăt geh cồng nha ală jơnau sồr, Kơrnoăt, ngan là Kơrnoăt Pơrjum dờng dơ̆ XIII bơh Đảng dê, Kơrnoăt Pơrjum dờng khoă XVI Đảng ƀộ càr dê mờ lơh geh uă cồng nha kwơmàng.

Tàm Dơ̆ bơyai lơh tơngkah kir sơnrai 50 nam tam lơh pha lin Đăk Tô- Tân Cảnh, Đảng ƀộ, gơnoar ătbồ, ling klàng mờ làng bol càr Kon Tum chờ hờp dờp rò Kơrnoăt bơh Thủ tướng Cíñ phủ dê bơtơl tiah tềl lời wơl Tiah jơnhoa 1015 mờ Tiah jơnhoa 1049 tàm kơnhoàl Sa Thầy mờ Đăk Tô tơmŭt tàm tiah tềl lời wơl dà lơgar dờng màng Tiah tam lơh pha lik Đăk Tô- Tân Cảnh. Tơn jơh bơnah bơyai lơh tơngkah kir sơnrai, ală kwang bàng bal mờ gơ̆p sền dơ̆ lơh đơs crih tam ya bal mờ tơngume “Đăk Tô- Tân Cảnh- Dùl tŭ tơngai bơkàu ồs”.

Cau mblàng Lơ Mu K’Yến