VOV4.K’ho- Drim ngai 29/08, rlau 450 rơbô nă kơnòm bơsram bơh càr Dăk Lăk dê neh mŭt tàm nam bơsram pa 2022-2023. Chờ hờp, hô hơng tàm bơrlŭ bal mờ dùl ết bơta kơlôi sơnơng, rơngòt tàm ngai sơnrờp lòt bơsram wơl tơnơ̆ tơngai ơm rlô bơkang jòng là nùs nhơm bal bơh ală kơnòm bơsram, mè bèp kơnòm bơsram mờ cau pơgru dê.

Kơnòm bơsram hìu bơsram kấp 1 Võ Thị Sáu tàm ngai sơn rờp lòt bơsram

Nam bơsram pa 2022-2023, jơh gùt càr Dăk Lăk geh rlau 450 rơbô nă kơnòm bơsram bơh kấp mầm non tus kấp pe. Nàng lơh geh nùs nhơm chờ hờp chờ hờñ ai ală kơnòm bơsram in tàm ală ngai sơnrờp lòt bơsram, Sở Giáo zụk mờ Đào tạo neh đơng lam ală hìu bơsram jat tơl ală bơta bơh hìu bơsram dê nàng bơyai lơh ală broă lơh chờ hờp, gơ kờñ, ờdo ờdă, di pal mờ sơnam kơnòm bơsram dê, bơta niam chài bơh yau bơh jơi bơtiàn dê nàng wă rò ală kơnòm bơsram, ngan là kơnòm bơsram pa sơnđờm mŭt bơsram bồ kấp. Bơh hơ̆ dong ală kơnòm bơsram in lơngap lơngai, pin dờn lài mờ tŭ mŭt tàm broă bơsram nam bơsram pa dê.

Cau mblàng K’Hạnh