VOV4.K’ho - Tơnơ̆ mờ 1 poh lơh jăt broă lòt bơsram tàm hìu bơsram tơn, kơnòm bơsram mầm non, kấp 1 mờ kơnòm bơsram mpồl ơdŭ 6 tàm ƀòn dờng Buôn Ma Thuột, càr Dăk lăk pal rê wơl mờ broă bơsram pờ tơlik tàm internet bơh ngai 21 nhai 02 nam 2022 tus tàm tŭ geh jơnau yal pa.

Kơnòm bơsram Mầm non, kấp 1 tàm ƀòn dờng Buôn Ma Thuột ơm ờ lòt bơsram tơnơ̆ mờ 1 poh lòt bơsram tàm hìu bơsram

Tơngu me geh UɃÑZ ƀòn dờng Buôn Ma Thuột càr Dăk Lăk tơlik kơrnoăt ơm ờ lòt bơsram tàm hìu bơsram gơwèt mờ kơnòm bơsram mầm non, kấp 1 mờ kơnòm bơsram mpồl ơdŭ 6 là tài kòp kovid-19 gam gơtìp kal ke tàm ƀòn dờng do. Tus tŭ do, neh geh rơlao 40 nă cau pơgru mờ rơlao 420 nă kơnòm bơsram geh gŏ mờ virus Sars KoV-2. Cau kơnòm dềt hờ đơm 11 sơnam ờ hềt cit sơnơm vaccine rơcang sơndră mờ kòp kovid-19. Nàng gàr niam ờ do ờ dă bơta pràn kơl dang să jan kơnòm bơsram bal mờ cau pơgru, UɃÑZ ƀòn dờng Buôn Ma Thuột, càr Dăk Lăk neh sồr ơm ing bơto bơsram tàm hìu bơsram gơwèt mờ kơnòm bơsram mầm non, kấp 1 mờ ơdŭ 6 tàm ƀòn dờng do bơh ngai 21 nhai 02 nam 2022 tus tàm tŭ geh jơnau yal pa. Jào phòng Giáo dục mờ Đào tạo lơh jăt gùng dà broă bơsram pờ tơlik tàm internet mờ ală kấp bơsram do.

Cau mblàng Ndong Brawl