Àng drim poh nggùl nhai 3 Tây Nguyên dê, tềng hơ đơm mƀur tờm chi, ƀlàng Hìu bơsram kâp 2 Ngô Mây tàm xã Ea M’Droh, kơnhoàl Cư Mgar, càr Dăk Lăk gơ lơh duh hồl rlau tŭ rơndeh sền sră làm bă tiah tus mờ ală kơnòm bơsram. Tàm do, bal broă sền sră ƀău, jòi git jơnau yal tàm internet, ală oh gam geh tus bal uă broă lơh nhơl ñŏ, sền git ngan ngồn. Kờn sềr rùp, oh Triệu Yến Nhi, kòn cau Dao, kơnòm bơsram ơdŭ 6A, mhar ngan jòi he in ală pang sră bè sềr rùp mờ jòi git bè ală cau chài sềr rùp tiơng pơn rơ tàm dunia: “Oh gŏ sră niam ngan mờ gơ kờñ ngan, bè niam chài, cau sềr rùp mờ uă bơta ndai tai. Oh kờñ tơnơ̆ do gơ gơs dùl nă cau sềr rùp jak chài bè Van Goh. Tơnơ̆ tŭ sền git ală broă lơh, oh gŏ gơ lơh chờ hờp ngan, gơ cèng wơl ală jơnau bơceh pa uă ngan”.

Ai tàm hìu bơsram kâp 2 Lê Hồng Phong, xã Ea Nam, kơnhoàl Ea H’leo, do là dơ̆ 2 rơndeh sền sră làm bă tiah cèng tus bơta chờ hờp ală kơnòm bơsram in. Oh Nguyễn Thảo Mỹ, kơnòm bơsram ơdŭ 9A4, chờ hờp đơs: “Oh geh tus bal ală bơta nhơl ñŏ bơh ală bi bơyai lơh mờ tus bal mòn phan lơh wơl mờ ală oh ơdŭ 6, ơdŭ 7 mờ sền sră bal mờ ală bơyô. Bơta kơp kờñ oh dê là tơnơ̆ do lơh cau sền sơ wì jơnau cih. Broă sền sră geh bơ tơl he in uă ngan, kuơmàng là tŭ cih sră, oh gơtùi ngui ală jơnau cih tàm hơ̆”.

Geh git, rơndeh sền sră làm bă tiah “Bơta àng bồ tơngoh git wă” bơh Vụ Thu viện (Ƀộ Văn hóa, Thể thao mờ Zu lịc) pơgồp bal mờ Kes priă Thiện Tâm (Tập đoàn Vingroup) jàu ai ală hìu prap mờ sền sră tàm gùt lơgar in. Tàm Dăk Lăk, rơndeh geh rlau 2 rbô pang sră bal mờ uă bơta bè jơnau cih, sră kơnòm dềt, kah yau, sră sền git… Bơdìh hơ̆ tai, rơndeh gam geh rơcang ti vi, măi tíñ tờm, 6 nơm măi tíñ ià tê, măi pờ, phần mềm atbồ prap sră, phầm mền sền sră ai cau jơngo mat in…

Lam lơh bơh lồi nam 2019 tus tŭ do, Hìu prap mờ sền sră càr Dăk Lăk neh sùm bơyai lơh rơndeh sền sră làm bă tiah drơng tàm ală hìu bơsram tiah sar lơgar ngài. Mò Trần Thị Thu Hà, Phó Kwang atbồ Hìu prap mờ sền sră càr Dăk Lăk pà git, bal mờ ală broă lơh sền sră, yal tơnggit sră pa, đah hìu prap mờ sền sră gam bơyai lơh uă broă lơh nhơl ñŏ, geh phan ƀàn dềt nàng pơn jờng kơnòm bơsram. Jat broă rơndap lơh nam 2023, rơndeh sền sră “Bơta àng bồ tơngoh git wă” rơp pơn jat tai lơh 96 broă lơh, nàng kờñ lơh gơ rề uă niam chài sền sră tus jơh tơl nă cau, kuơmàng là gơ wèt mờ ală kơnòm bơsram: “Gơ wèt tàm tơl mpồl cau kờñ drơng mờ bơta geh ngan, hìu prap mờ sền sră càr rơp tam gơl pa ală bơta nhơl ñŏ, ală broă lơh chờ hờp bal mờ sră, halà bơyai lơh ală dơ̆ pơrlòng dềt gơ jat bal mờ sră, dong ală oh gŏ sền sră là dùl broă lơh prài bồ tơnguh, ờ rồn bơklơn mờ lơh gơlik bơta pơn jờng sền sră tai”.

Bal mờ càr Dăk Lăk, rơndeh sền sră “Bơta àng bồ tơngoh git wă” neh geh lam lơh tàm ală tiah ndai tàm Tây Nguyên. Tàm Gia Lai, rơndeh sền sră uă bơta làm bă tiah geh priă tă lơh rlau 1 tơmàn đông. Tàm rơndeh geh rơndap ơn rlau 5 rbô pang sră ală bơta, 10 nơm măi tíñ tơrbŏ internet, ti vi; bơdìh hơ̆ tai, gam geh sră đơs mờ ală bơta phan bơna điện tử drơng cau jơngo mat in. Jat jơnau đơs bơh kwang đơng lam bồ Hìu prap mờ sền sră càr Gia Lai dê, do là dùl broă lơh geh kuơ ngan ngồn, dong ală hìu sền sră rơcang lài lam lơh ală broă lơh ai jơnau tơnggit tus rềp mờ làng bol, pơgồp bơnah tơn jơh bơta ờ git jơnau yal, ờ git ngui kông nghệ, rề ơnàng srơh sền sră, ƀău.

Ai tàm Lâm Đồng, Hìu prap mờ sền sră neh pơgồp bal lam lơh ală rơndeh sền sră làm bă tiah “Bơta àng bồ tơngoh git wă” tus drơng tàm 21 hìu bơsram bơh kâp 1 tus kâp 3 tàm ală kơnhoàl Đức Trọng, Lâm Hà mờ ƀòn dờng Bảo Lộc. Mờ mờr 3 rbô pang sră ai lòt drơng geh uă bơta bè: bơto bơtê nùs tồr; pơlam tàp bơta chài kis; bơto bơtê ùr klau, sră jơnau cih, sră rùp kơnòm dềt… neh gơ hòi gơ jà git nđờ rbô dơ̆ kơnòm bơsram tus bal.

Rơndeh geh sơnđan “Bơta àng bồ tơngoh git wă’ neh lơh gơs dùl nùs nhơm pa, pơgồp bơnah lam lơh ngan ngồn Rơndap broă lơh Bơtàu tơnguh niam chài sền sră tàm mpồl bơtiàn. Rơndap broă lơh Sơlơ tơnguh ală broă lơh bơsram sră jơh rài kis tàm ală hìu prap mờ sền sră, ƀảo tàng, hìu niam chài, kâu lạk ƀộ neh geh Thủ tướng Cíñ phủ ring bal. Rơndeh oto sền sră làm bă tiah pơgồp bơnah lơh geh cồng nha tàm broă tơnguh niam chài sền sră ai ală kơnòm bơsram in.