Tàm nùs nhơm chờ hờp bơh Satềp Trung thu dê, Phó Củ tịc lơgar mò Võ Thị Ánh Xuân bal mờ Mpồl kwang bàng lơh broă mờ kwang đơng lam càr Dăk Lăk neh tus bal ală broă lơh: tus sền, nhơl ală dơ̆ nhơl ờs mờng, lơh gŭ đèng, wă rò sơnpòl đèng, sền tamya nggài mờ sền ală dơ̆ đơs crih tamya tàm mang chờ àng kơnhai ndar me. Di tàm dơ̆ do, Phó Củ tịc lơgar mò Võ Thị Ánh Xuân neh pà 270 khà priă bơsram, 120 nơm rơndeh coh ai kơnòm bơsram geh rài kis gơtìp kal ke in, jào pà 1 nơm hìu ai kòn dềt kòn đời mờ 1 rơbô 500 pò phan kờp jơh geh rơlao 1 tơmàn đong.

Oh Nguyễn Quách Tuệ Minh, dùl tàm ală kơnòm bơsram geh dờp phan pà pà git: “Kòn chờ hờp ngan tài satềp Trung thu geh pà rơndeh coh, bơta do geh dong kờl kòn lòt bơsram ƀuơn rơlao. Kòn kung hơ is mờ să tờm kòn dê geh lơh ngan bơsram jăk nàng geh bơsal wơl mờ nùs nhơm niam bơh ală wa ală mlŏ dê”.

Phó Củ tịc lơgar mò Võ Thị Ánh Xuân pơn jờng ală broă lơh ngan bơh càr Dăk Lăk đơs bal mờ kơnhoàl Ea H’ Leo đơs is tàm ală nam do neh ai broă sền gròi dờng màng ngan tus mờ ală kơnòm pa tào, kơnòm dềt in. Mờ Phó Củ tịc lơgar kơ̆p kờñ, tàm tơngai tus, ală anih lơh broă, mpồl lơh broă mờ ală broă lơh loh làng, mùl màl, hòi jà broă tus bal bơh ală mpồl lơh broă cíñ trị, mpồl bơtiàn lơh sa kă bro mờ gùt mpồl bơtiàn pơn jăt tai drơng gàr, di tŭ lam sồr, dong kờl kơnòm dềt, kơnòm bơsram geh rài kis kal ke mờ sền do là kơnòl tờm, jŏ jòng.

Bal mờ nùs nhơm chờ satềp Trung thu tàm gùt lơgar dê, ală ngai do, geh uă mpồl lơh broă, mpồl cau tàm càr Dăk Lăk neh tus bal hòi jà tă priă nàng bơyai lơh chờ nhơl, pà phan ai ală kơnòm dềt tàm ală ƀòn in.

Ƀlàng tềng đăp hìu pơrjum ƀòn tàm ƀòn Trăp, xã Ea Hđing, kơnhoàl Cư̆ Mgar, càr Dăk Lăk neh gal cau tus nhơl sền. Ală kơnòm dềt tàm ƀòn geh ală bi đoàn viên ơruh pơnu tàm Huyện đoàn mờ ală cau dong kờl tus bơyai lơh Àng kơnhai ndar me kờñ gơboh mờ geh uă ngan broă lơh nhơl chờ, pà phan. Cèng kơl dung ƀañ bal mờ gŭ đèng pa geh dờp tơnơ̆ mờ tŭ tus bal nhơl, oh H’ Trúc Êban chờ hờn đơs: “Ngai do kòn chờ hờp ngan tŭ geh ală bi tus tàm do mờ bơyai lơh chờ satềp Trung thu bè do. Nam tơnơ̆ kòn kung kơ̆p kờñ ală bi geh tus tai mờ bơyai lơh chờ trung thu bè do sơl, broă lơh chờ bè do lơh nùs nhơm oh chờ hờp ngan”.

Ồng Y Tứ Niê, Kwang atbồ ƀòn Trăp pà git neh geh 100 pò phan geh pà ală kơnòm dềt tàm ƀòn di tàm dơ̆ do. Uă nam do, mờ broă dong kờl bơh ală mpồl lơh broă, ală mpồl dong kờl pah tŭ satềp trung thu tus ha là ngai chờ kơnòm dềt dê, ală kơnòm dềt geh tus bal ală broă nhơl chờ, tơrgùm bal niam ngan. Tàm tơl broă lơh, ală mpồl lơh broă ndrờm pơgồp bal bơyai lơh mờ uă broă lơh ndai nàng chờ nhơl mờ geh nùs nhơm bơto bơtê gơrềng tus mờ broă sền gàr kloh niam să tờm, kloh niam să jan, sền gàr tiah kis, lơh geh ngui wơl siồ siă. “Tàm ală nam pa do den geh broă sền gròi bơh gơnoar atbồ ƀòn lơgar kung bè ală cau geh nùs nhơm niam den ƀòn Trăp neh geh dờp uă broă lơh pà phan bơh ală mpồl lơh sa kă bro kung bè ală mpồl lơh broă. Bơh ală broă lơh bè do den neh dong kờl làng bol iang nùs bè gùng dà broă lơh bơh Đảng, iang nùs tàm broă lơh sa. Gơwèt mờ ală kơnòm dềt den ală oh kòn chờ hờp ngan tŭ geh dờp ală pò phan pà geh kwơ ngan”.

Tàm xã Cư̆ Kbang, kơnhoàl tiah nhàr dà lơgar Ea Súp, broă lơh “Àng kơnhai tiah nhàr dà lơgar – Trung thu tus tàm ƀòn” geh ală mpồl cau geh nùs nhơm niam bơyai lơh mờ uă broă lơh geh kwơ. Ờ mìng geh chờ nhơl, ală kơnòm dềt in mờ gam geh pơgồp bal yal mblàng bè broă sền gàr tiah kis mờ bơto bơtê phan lời wơl niam chài mờ tơngu me rơwas tàm rài kis bơh kòn cau Mnông dê. Ha là bè tàm kơnhoàl tiah ngài Krông Bông, geh uă mpồl lơh broă nùs nhơm dong kờl is bơh ƀòn dờng Hồ Chí Minh pơgồp bal mờ Mpồl Cữ thập đỏ bơyai lơh broă lơh satềp trung thu pơgồp bal mờ kham kòp, pà sơnơm, pà phan ai cau rơƀah mờ kơnòm dềt tàm kơnhoàl do in. Bơh ală broă lơh do, geh git nđờ rơbô pò phan neh geh jào pà ai ală kơnòm dềt in, dong kờl ală kơnòm dềt geh gŏ nùs nhơm chờ bơh satềp trung thu dê. Tàm hơ̆ uă ngan là gơwèt mờ ală kơnòm dềt kis tàm tiah ngài, ală phan pà bŭ lah ờ uă mơya geh cèng uă bơta kwơ nùs nhơm dờng màng. Bi Y Chuôr Buôn Krông, Ƀí thư đoàn hìu bơsram Đại họk Tây Nguyên đơs: “Kơ̆p kờñ pơyoa tus ală kơnòm dềt in geh ngai chờ trung thu nàng ală oh geh tai ƀlàng nhơl nàng bơtàu tơnguh tai kung bè dong kờl tai broă bơsram sră. Bŭ lah tus mờ broă lơh den ờ geh uă phan pà kwơ màng, mơya kung lơh ngan jơh pràn nàng tam pà bal mờ ală kơnòm dềt tàm ƀòn, tàm hơ̆ uă ngan là ală kơnòm dềt geh rài kis gơtìp kal ke”.

Ală pò phan là ƀañ, kèo, phan ngui bơsram ha là ală priă dong kờl bơsram sră bŭ lah ờ uă, mơya cèng geh bơta kwơ màng bè nùs nhơm, ngai sơlơ git sền kwơ gơwèt mờ ală kơnòm dềt tàm ală tiah ngài, tiah kal ke dê. Ờ mìng là broă lơh dong kờl ală kơnòm dềt geh tai ƀlàng nhơl, tơl broă lơh satềp trung thu tus mờ ală ƀòn kung là dơ̆ nàng ală kơnòm dềt geh gŏ nùs nhơm chờ bơh dơ̆ satềp Trung thu ờs mờng dà lơgar dê.