VOV4.K’ho - Ƀộ Y tế kờp dŭ lơh “Sră kim ta vaccine” sơn đờm bơh ngai 15 nhai 04 tus nàng làng bol ƀuơn tàm broă lòt hờ lơgar bơdìh. Hơ̆ là jơnau yal geh đơs tus tàm pơrjum pờ tơlik tàm internet geh Ƀộ Y tế bơyai lơh bè broă bơto sồr lơh jăt broă lơh “Sră kim ta vaccine” mờ lơh jăt broă bơtơl, ai jơnau tơngit cit sơnơm rơcang sơndră mờ kòp Kovid-19.

Kờp tus ngai 01 nhai 4, gùt lơgar neh cit geh rơlao 200 tơlăk ding sơnơm vaccine rơcang sơndră mờ kòp kovid-19. Khà geh cau neh cit ai cau bơh 18 sơnam rơlao hờ đang ding dơ̆ sơnrờp là mờr 100%, ding dơ̆ bàr là 99%, mờ khà cau neh cit ding dơ̆ 3 geh di pơgăp 50%. Gơwèt mờ cau bơh 12 tus 17 sơnam, khà ding sơnrờp là 99% mờ ding dơ̆ 2 là 94%. Ƀộ Y tế mờ ală tiah kung gam rơcang nàng cit sơnơm vaccine rơcang sơndră mờ kòp kovid-19 ai kơnòm dềt bơh 5 tus hờ dơm 12 sơnam in. Tŭ do, ală hìu cit sơnơm tàm gùt lơgar gam rơcang ală bơta phan geh kwơ nàng Ƀộ Y tế bơyai lơh ai :Sră kim ta vaccine” ai làng bol kờp dŭ bơh ngai 15 nhai 4 tus. “Sră kim ta vaccine” geh tơlik tàm pang sră bơta pràn kơl dang să jan điện tử, PC-Kovid-19 ha là jòi sền tàm Anih yal tơngit điện tử bơh Ƀộ Y tế.

Cau mblàng Ndong Brawl