VOV4.K’ho - Mpồl ling sền gàr tiah nhàr dà lơgar càr Kon Tum pơgồp bal mờ mpồl ling sền gàr tiah nhàr dà lơgar càr Tây Ninh pa dong klàs mờ cèng rê geh cồng nha oh Y Liên pa gơtìp pơrlồm tăc tus lơgar Campuchia mờ jơnau hơ geh lơh broă ờ glar bòl sa priă nhai uă. Ală bơta lơi neh gơtìp mờ oh Y Liên pà gŏ gam geh uă ngan bơta bơchồt cau kơnòm să, ờ hềt git kơlôi sơnơng, ờ hềt git wă tàm rài kis mờ ờ geh bơta rơcang lài.

                               Nùs nhơm chờ hờp bơh oh Y Liên bal mờ ală cau tàm hìu

Tơnơ̆ mờ rơlao bàr ngai geh cau ling sền gàr tiah nhàr dà lơgar dong klàs bơh lơgar Campuchia cèng rê mờ hìu nhă, nùs nhơm oh Y Liên neh rơhời niam. Wă bol añ tàm hìu neh klar sèt tàm ƀòn Kei Joi, xã tiah nhàr dà lơgar Đăk Xú, kơnhoàl Ngọc Hồi, càr Kon Tum, ală cau tàm hìu, tàm hơ̆ uă ngan là mò, ồng, mè, bèp bal mờ ală oh bơh Y Liên dê ndrờm tơlik nùs nhơm chờ hờp bơh să tờm dê. Bi A Van, bèp oh Y Liên đơs bè do: “Añ chờ ngan, añ ñìm kung ờ git ñìm bè lơi tai, gơhòr dà măt. Ñìm ờ lar ñìm, ñŏ ờ lar ñŏ. Ală bi cau ling sền gàr tiah nhàr dà lơgar đơs là bañ moăt tai”.

Jơnau tờm lơh gơtìp tus mờ broă oh Y Liên, 16 sơnam, kòn cau Sơdàng kis tàm xã tiah nhàr dà lơgar Đăk Xú, kơnhoàl Ngọc Hồi, càr Kon Tum gơtìp pơrlồm tăc tus lơgar Campuchia là tài bơh broă lơh ờ niam să tờm oh dê. Bồ nam 2022, oh Y Liên ngui sră kim ta bơh cau pròc mhàm nàng tơl sơnam lơh broă hơ̆ sồng jăt is cau tàm ƀòn lòt tus càr Bình Dương nàng lơh kông ñân.

   Geh lơh broă tàm hìu là nùs nhơm kơ̆p kờñ ngan bơh Y Liên dê tàm tơngai gam ơm tàm lơgar Campuchia

Tàm ngai do Liên kwèng mờ 1 nă cau klao geh măt sơnđan tàm facebook là Lê Ngọc Nhất. Nhất pơn jồh Y Liên lòt tus lơgar Campuchia “lơh broă ờ glar bòl priă geh 20 tơlăk đong tàm 1 nhai” tàm 1 kông ty lơgar Lo dê mờ hơ di lah ờ geh lơh broă den Nhất geh tă priă nàng Liên rê wơl hờ lơgar Việt Nam.

Ngai 18 nhai 04 nam 2022, Y Liên bal mờ 5 nă cau ndai, tàm hơ̆ geh 2 nă cau ùr, 3 nă cau klao ờ git loh măt sơnđan, ờ kwèng geh cèng tus lơgar Campuchia jăt gùng ù tàm tiah nhàr dà lơgar càr Long An. Tŭ tus tàm ù tiah lơgar Campuchia, tơl nă cau lơh broă dùl tiah ờ geh tìp bal mờ Nhất kung kơrian jơh ală phan lơh broă den tàng Y Liên ờ gơtùi hòi tus mờ ală cau do. Gam ờ hềt jơh ngòt rơngơ̆t bè ală broă neh rơlao, Y Liên pà git să tờm sùm gơtìp lơh aniai bè nùs nhơm tàm tơngai lơh broă ală kông ty cau lơgar Lo tàm lơgar Campuchia: “Kơno cau đơs là, di lah ờ lơh gơtùi den cau cèng tăc, krơ̆ tàm thùng cèng tus dà lềng mờ cơm sơbì nàng bơya in sa. He mìng geh ơm tàm kông ty nàng lơh broă mơ, ờ cau ai lik hờ bơdìh. Uă tiah geh lơh bơh 8 jơ drim tus 12 jơ mang. Geh tiah lơh bơh 10 jơ drim tus 11 jơ mang. Geh tiah lơh broă tŭ trồ mang bơh 11 jơ mang tus 11 jơ ngai”.

Kwang bàng, cau ling tàm mpồl ling sền gàr tiah nhàr dà lơgar Đăk Xú tus còp să, lam sồr Y Liên mờ ală cau tàm hìu

Do là broă lơh ờ geh cồng nha, bơh nhai 4 tus nhai 07 nam 2022, Y Liên neh gơtìp tăc tus 6 kông ty mờ pah dơ̆ tăc bè hơ̆ den khà priă gơguh bơh 1 rơbô 800 dolar Mỹ tus 3 rơbô 500 dolar Mỹ. Do kung là khà priă mờ kông ty dơ̆ 6 sồr Y Liên pal jào wơl tŭ kờñ ơm ờ lơh broă nàng rê hờ lơgar Việt Nam. Bơta ngòt rơngơ̆t rơlao là 6 kông ty mờ Y Liên lơh broă tàm lơgar Campuchia ndrờm geh jơnau kờñ ndrờm bal, hơ̆ là sồr cau lơh broă lơh app nàng lơh kwèng mờ pơrlồm cau ndai nàng ai priă mờ pơn jồh cau tus hờ lơgar Campuchia: “He pal chờ gờm cau năc, lòt jòi cau nàng kŭp cau gơboh mờ he. Sồr gơboh ngan den tàng cau pin dờn mờ he. He kŭp sồr cau tă priă den cau lơh jăt bal. Cau sơlơ pin dờn den he sơlơ kŭp cau lơh bŭ lah 100 tơlăk. Cau ờ geh priă tai den he jà cau lòt càn priă. Cau ờ càn geh priă tai den he lòt jòi cau ndai geh priă. Cau lơi kờñ geh priă den he pơn jồh hơ̆ sồng đơs là tus tàm do lơh broă geh priă nhai uă ngan. He jòi cau bơh lơgar Việt Nam tus lơgar Campuchia lơh broă den geh di pơgăp bơh 300 dolar Mỹ tus 500 dolar Mỹ tàm dùl nă cau”.

Là cau ùr kòn cau Sơdàng mìng rơ̆p 16 sơnam, ờ git broă lơh, ờ jai ơ̆t mờ broă ngui nùs nhơm kờñ gơboh nàng pơrlồm cau sa priă mờ jòi cau, ngai 17 nhai 7 nam 2022, Y Liên yòng điện thoại bơh 1 nă cau lơgar Việt Nam lơh broă bal hòi ờm tus mờ cau tàm hìu nhă nàng dong klàs. Bơh broă lơh tàm tiah do, pôs ling sền gàr tiah nhàr dà lơgar Đăk Xú git bè broă Y Liên, den tàng neh yal tus mờ Mpồl đơng lam ling sền gàr tiah nhàr dà lơgar càr Kon Tum.

Mờ broă kờñ lơh ngan nàng dong klàs geh Y Liên, bơh ală broă lơh tờm, sơndră mờ ma tuý bal mờ cau tìs, Mpồl đơng lam ling sền gàr tiah nhàr dà lơgar càr Kon Tum pơgồp bal mờ mpồl ling sền gàr tiah nhàr dà lơgar càr Tây Ninh neh cèng Y Liên rê tus lơgar Việt Nam tàm ngai 20 nhai 8 nam 2022. Tơngai geh dong klàs Y Liên gam lơh broă tàm dùl kông ty tềng gùng 702, Bãi Si Hai, càr Sihanouk, lơgar Campuchia ngài mờ mpồng nhàr dà lơgar dunia Mộc Bài, càr Tây Ninh di pơgăp 470 kơi sồ hờ đah jum. Jơnau yal bè broă dong klàs cau gơtìp kŭp, Thiếu tá Bùi Công Huân, kwang bàng lơh broă tàm mpồl ling rơcang sơndră mờ ma tuý mờ cau tìs, gơwèt mpồl đơng lam ling sền gàr tiah nhàr dà lơgar càr Kon Tum pà git: “Bơh broă tơnklàs cau gơtìp kŭp rê gơtìp kal ke. Hòi kông ty cau gơtìp kŭp lơh broă, kông ty do ờ ai cau ngui điện thoại mờ kung kal ke ngan kờñ git cau gơtìp kŭp ơm tàm tiah lơi. Tàm tơngai lơh broă tàm đah hơ̆, cau gơtìp kŭp sùm gơtìp rồn bơklơn lơh broă, tơngai lơh broă bơh 12 jơ tus 18 jơ tàm 1 ngai. Bơdìh hơ̆ tai broă sào sa, ơm kis kung ndơ̆p ngan. Mpồl cau sền gàr geh phào, geh gar phào den tàng cau gơtìp kŭp ờ gơtùi lĭk hờ bơdìh, ờ git gùng lòt den tàng kal ke ngan tus mờ mpồl dong klàs”.

Tơnơ̆ mờ rơlao 2 ngai geh dong klàs, rê kis mờ cau hìu nhă tàm ƀòn Kei Joi, xã tiah nhàr dà lơgar Đăk Xú, kơnhoàl Ngọc Hồi, càr Kon Tum, Y Liên neh rơhời geh wơl nùs nhơm niam. Geh broă pơn dờm mờ lam sồr bơh ală cau ling sền gàr tiah nhàr dà lơgar kung bè mò ồng, mè bèp, oh neh yal wơl jơh ală tơngai gơtìp pơrlồm tăc mờ lơh broă tàm 6 kông ty cau lơgar Lo tàm ù tiah lơgar Campuchia. Jơnau mờ Y Liên kờñ đơs ngan tŭ do là ưn ngài ală wa cau ling sền gàr tiah nhàr dà lơgar mờ kơ̆p kờñ bañ geh cau gơtìp pơrlồm tus lơgar Campuchia lơh broă ờ glar sa priă nhai uă bè Y Liên dê tai.

Cau cih Khoa Điềm-Cau mblàng Ndong Brawl