Geh bơyai lơh tàm 02 ngai bơh ngai 23 tus ngai 24 nhai 09, Ngai chờ mŭt lơh broă tam gơl pa bơceh lơh càr Dăk Lăk nam 2024 (Techfest Dăk Lăk 2024) geh uă broă lơh bè: ràng tơlik yal ală rơndăp broă lơh, phan mŭt lơh broă, OCOP, lơh sa mờ măi mok ƀòn lơgar, drơng broă lòt nhơl; ờ uă dơ̆ pơrjum cri bơyai bè mŭt lơh broă tam gơl pa bơceh lơh, mŭt lơh broă tơlir, broă lơh pràn mŭt lơh broă tàm ală gah, ală gah broă, ală mpồl cau… Do là broă lơh geh bơyai lơh pah nam, nàng ai geh bơta niam tìp bal tàm mpồl bơtiàn mŭt lơh broă, tơrbŏ bal bơcri priă, jòi geh anih lơh broă, pờ ơnàng drà kă bro.

Tàm Ngai chờ mŭt lơh broă tam gơl pa bơceh lơh càr Dăk Lăk nam 2024, Sở Kông thương càr Dăk Lăk bơyai lơh Pơrjum tơrbŏ bal tìp măt kă bro, tăc phan geh lơh nam 2024. Pơrjum wèt tus jơnau kờñ lơh gơs bơta pràn, lơh geh uă mờ bơtàu tơnguh nùs nhơm mŭt lơh broă, nùs nhơm cau lơh sa kă bro tàm ală làng bol dê gơwèt mờ broă mŭt lơh broă tam gơl pa bơceh lơh, tơrbŏ bal ală bơta tờm niam, ală cau khoa họk, cau atbồ, mpồl bơtiàn mpồl lơh sa kă bro kờñ dong kờl, ai geh gùng dà bơtàu tơnguh phan geh lơh. Tus bal pơrjum, ồng Đường Văn Quân, Kwang atbồ Kông ty kổ phần phan sa bơkah Cao Nguyên pà git: “Tàm broă bơyai lơh do añ kờñ tam pà bal mờ ală mpồl pa mŭt lơh broă ha là sơn đờm geh phan ai tăc tàm drà kă bro nàng sền gŏ ală broă lơh ai phan geh lơh tus tàm drà kă bro bè lơi. Bơh tàm broă geh jơnau kơlôi sơnơng, tus mờ kơl dung dăp phan geh lơh, ală sră pơ-àr gơrềng bal tus mờ adăt boh lam bè phan geh lơh tŭ ală cau kờñ tus bal drà kă bro. He geh dùl mpồl bơtiàn nàng dong kờl bơto bơtê ờ sa priă”.

Di tàm dơ̆ do, tàm ƀòn dờng Buôn Ma Thuột kung neh bơyai lơh Pơrjum lơh pràn bơta niam mŭt lơh broă tam gơl pa bơceh lơh càr Dăk Lăk. Tus bal cri bơyai, PGS.TS ồng Lê Đức Niêm, Phó Kwang atbồ Hìu bơsram Đại họk Tây Nguyên đơs là, bơta niam mŭt lơh broă tam gơl pa bơceh lơh tàm càr Dăk Lăk gam tàm kấp 2, do là kấp lài tờm ngan, ờ hềt lơh gơs. Den tàng, pal pơn jăt tai lơh gơs ală bơta, bơ̆t bơtàu ală bơta bè priă, bơto bơtê…

PGS.TS ồng Lê Đức Niêm pà git: “Lài jơh là pal tơl, geh tơl ală bơnah broă, hìu bơsram đại họk, mpồl lơh sa kă bro, mpồl lơh sa kă bro lam lài, ală anih lơh broă, ală gah broă, tàm hơ̆ uă ngan là geh gùng dà broă lơh bơh càr, tàm hơ̆ geh ală cau geh jơh nùs lơh broă nàng sùm lơh pràn bơta niam mŭt lơh broă bơtàu tơnguh. Dơ̆ bàr tai là geh lơh nền nòn, ală broă lơh ờ hoan geh lơh gời rơlao, geh lơh nền nòn mùl màl rơlao, dong kờl ală mpồl lơh sa bơtàu tơnguh. Di lah bơtàu tơnguh bơta niam mŭt lơh broă niam den mpồl lơh sa kă bro rơ̆p geh tàm bơta niam hơ̆ dê”.

Tàm ală ngai Ngai bơyai lơh chờ mŭt lơh broă tam gơl pa bơceh lơh càr Dăk Lăk nam 2024, ală mpồl lơh broă neh ràng, yal mờr 150 hìu ràng phan mŭt lơh broă bơceh lơh, phan OCOP, lơh sa mờ măi mok ƀòn lơgar, phan drơng lòt nhơl bơh ală mpồl lơh broă, mpồl lơh sa kă bro tàm càr dê. Ồng Nguyễn Tuấn Hà, Phó Củ tịc Duh broă sùm Anih duh broă Làng bol càr Dăk Lăk đơs, cồng nha bơh ngai chờ là bơta lài ngan lam sồr pràn kơl dang nùs nhơm mŭt lơh broă tàm ală làng bol, kơnòm bơsram, cau bơsram dờng. Lơh pràn ală bồ tơngoh kơlôi sơnơng tam gơl pa bơceh lơh, bơ̆t bơtàu bơta niam mŭt lơh broă tam gơl pa bơceh lơh càr ngai sơlơ kơl jăp, mùl màl mờ geh cồng nha.

Ồng Nguyễn Tuấn Hà pà git: “Ală dơ̆ cri bơyai geh lơh nền nòn tàm ală tơngu me, bè cri bơyai gơrềng tus broă tam gơl pa bơceh lơh den hìu bơsram đại họk Tây Nguyên neh sền kwơ tàm broă tam gơl pa bơceh lơh tàm kơnòm bơsram, cau bơsram dờng, gam Sở Rơndăp broă Bơcri priă den tam gơl pa bơceh lơh tàm mpồl lơh sa kă bro, mpồl lơh broă bal. Tŭ cri bơyai bè nòn bè hơ̆ den cồng nha lơh geh niam ngan. Ală bơta phan bơh ală bơyô mŭt lơh broă kă bro kung ngai sơlơ lơh nền nòn, muh măt phan ngai sơlơ niam mờ gơguh bơta kwơ, lơh geh uă rơlao tus mờ ală làng bol”.

Gơtùi đơs, ală broă dong kờl mŭt lơh broă tàm càr Dăk Lăk neh lơh geh bơta gơdờp bal niam, pơgồp bal tàm broă bơ̆t bơtàu bơta niam mŭt lơh broă càr Dăk Lăk bơtàu tơnguh jăt bơta nền nòn, lơh geh uă nùs nhơm mŭt lơh broă uă tàm ală làng bol.