Tàm jơdŭ tơn pràn să bơh Hìu sơnơm Kơnòm dềt càr Gia Lai, lŏ Trần Khánh Huyền, kis tàm ƀòn drà dờng Ayun Pa, càr Gia Lai kơ̆p kòn klao 10 nhai kah wơl tơnơ̆ mờ tŭ reh pờih mbùng. Sềm muh măt lŏ gơlik geh bơta gơn kơnòm tơnơ̆ mờ ală ngai, nhai gơtìp kal ke bal mờ kòn. Lŏ Huyền pà git, bơh tŭ deh, kòn klao lŏ gơtìp uă bơta kal ke tài bơh bơta ờ niam do, bè sùm gơtìp tơrglă dà toh, gơtìp as sồt tồr, lơh bơta pràn kơl dang să jan ờ pràn mờ ờ mhar dờng.

Bơtoah ngan git tus mờ broă Reh Săp ñŏ, lŏ lùp mờ geh dong kờl. Bơh tàm broă tă priă lòt rê, kham rơwah tus mờ reh, jơh ală ndrờm ờ sa priă mờ geh lơh nền nòn ngan. Lŏ Trần Khánh Huyền pà git: “Broă tus kham rơwah, mpồl cau lơh broă jơh nùs ngan. Cau bơto sồr jơh ală bơta, gam dong kờl tai priă tuh xăng. Tŭ do reh, là dùl nă cau mè añ iang nùs rơlao nàng kòn añ gơtùi dờng pràn bè ờs bè ală kòn dềt ndai dê; kòp as sồt tồr di gơlan là gơmù rơlao pơn drờm mờ lài mờ tŭ reh”.

Tàm tiah ơm kơ̆p, bèp mờ kòn bi Phùng Theo Sáng, kòn cau Mông, kis tàm thôn Quảng Hoà, kơnhoàl Dăk Glong, càr Dăk Nông, kung kơlôi ngan sơl lài mờ tŭ reh pờih mbùng. Bi Sáng pà git, kòn bi dê 16 sơnam mờ tàm 16 nam do, bi sùm kơ̆p kờñ kòn geh reh, mơya ờ gơtùi tài rài kis hìu nhă gơtìp kal ke ir. Bi kơ̆p kờñ tơnơ̆ mờ dơ̆ reh, kòn bi dê gơtùi đơs, sào sa bè ờs nàng ờ ngòt rơlao tàm broă boh bơr. Bi Phùng Theo Sáng pà git: “Broă lơh do niam ngan tài añ pin dờn ngan bè mpồl ƀăk sĩ reh. Bol añ tus tàm do kờñ là broă reh ală kơnòm dềt in gơtùi sào sa, ƀuơn tàm broă đơs rơlao, nàng tơnơ̆ do ală kơnòm dềt gam gơtùi jòi bao kòn tai”.

Do là dơ̆ bàr broă Reh Săp ñŏ in, dùl broă lơh dong kờl kòn bơnus geh Mpồl Operation Smile Việt Nam pơgồp bal mờ Hìu sơnơm Kơnòm dềt càr Gia Lai bơyai lơh tàm càr Gia Lai. Nam lài, broă lơh do neh geh 104 nă kơnòm dềt reh geh cồng nha. Broă lơh nam do bơyai lơh kham rơwah lài ai di pơgăp 200 nă kơnòm dềt in mờ bơyai lơh reh ai di pơgăp 100 nă gơtìp pờih mbùng ờ hềt geh reh; bơta ờ niam gơlời wơl bơh dềt tềng mbùng (pờih mbùng, trồm tềng bơr, ờ niam tềng muh, ha tềng kàng sề), jơnkah nao tê, gơtìp nđir bal nao (tê, jơng) tàm càr Gia Lai mờ ờ uă càr rềp bal. Ală cau kòp geh kham rơwah, sơm mờ reh ờ sa priă, mờ geh dong kờl jơh ală priă tă lòt rê, sào sa, hìu ơm. Thạc sĩ, Ƀák sĩ Bạc Minh Tiến, Atbồ khoa Reh Lơh wơl mờ Niam, Hìu sơnơm Hữu nghị Việt Nam – Cuba, kwang lam bồ mpồl pà git: “Bol añ geh ală cau reh, ală ƀák sĩ lơh broă sơm kòp kơnòm dềt mờ ală cau lơh broă nùs nhơm dong kờl tus bơh Hà Nội, ƀòn dờng Hồ Chí Minh, càr Nghệ An mờ ƀòn dờng Huế, ală cau jơh nùs ngan mờ bol añ kung neh rơcang tơl bè khà sơnơm, bè phan bơna nàng gàr niam ală kơnòm dềt in kung gam geh di pal niam ngan bè đah lơh sơnơm dê mờ kơ̆p kờñ cèng wơl ală săp ñŏ kơnòm dềt in”.

Bè đah Hìu sơnơm Kơnòm dềt càr Gia Lai, mò Từ Thị Mai Linh, Phó Kwang atbồ Hìu sơnơm pà git, hìu sơnơm sùm lơh ngan lơh geh ală bơta niam ngan, ai jơh bal cau kòp, cau tàm hìu in nàng dơ̆ reh săp ñŏ dơ̆ do lơh geh cồng nha niam, mò Từ Thị Mai Linh pà git: “Khà ală kơnòm dềt tus mờ hìu sơnơm gal ngan, mpồl kung neh geh rơndăp broă lơh nàng lơh broă sùm, lơh broă tàm trồ mang mờ tơnguh broă lơh bal đah hìu sơnơm kơnòm dềt bal mờ mpồl dê nàng lơh broă geh niam rơlao mờ geh cồng nha rơlao”.

Broă lơh jăt broă lơh geh kwơ màng dong kờl kòn bơnus uă ngan, tơlik gŏ broă sền gròi bơh mpồl bơtiàn dê gơwèt mờ kơnòm dềt, kơnòm dềt koĕt kơl te geh rài kis gơtìp kal ke geh tus bal mờ ală broă lơh drơng ala geh bơta niam uă. Broă lơh do neh cèng geh să ñŏ, nùs nhơm pin dờn ai kơnòm dềt ờ bơtoah gơtìp ờ niam in, nàng ală kơnòm dềt geh wơl broă ơm kis bè ờs, geh bơta niam bơsram sră, nhơl mờ dờng pràn să jan kung bè ală bơyô nrơh nrang dê, pơgồp bal tàm broă dong kờl ală kơnòm dêt in geh rài tơnơ̆ do niam bơnĕ rơlao. Broă Reh Săp ñŏ ờ mìng dong kờl ală kơnòm dềt geh tơnpràn wơl să jan, jòi geh wơl săp ñŏ mờ gam dong kờl ală y ƀák sĩ tàm càr do tơnguh bơta chài broă lơh, git ală bơta chài gơguh jăk bơh mpồl cau chài do dê.