Mờ Bảo Lộc- Liang Khàng, tàm tơrbŏ bal gùng lòt rê kă bro phan bơh càr Lâm Đồng dê mờ ƀòn dờng Hồ Chí Minh bal mờ ală càr tiah đah Jum dà lơgar.

Rơndăp broă lơh bơcri priă lơh gơl gùng rơndeh ntoăt mhar Tân Phú- Bảo Lộc geh bơta jòng pơgăp 66 kơi sồ, tàm hơ̆ 11 kơi sồ lòt gan ù tiah kơnhoàl Tân Phú, càr Đồng Nai mờ 55 kơi sồ gơwèt ù tiah càr Lâm Đồng. Rơndăp broă lơh geh priă bơcri kờp jơh tàm tŭ tơngai tam pà dơ̆ lơh là 17 rbô 200 tơmàn đong, tàm hơ̆ priă dà lơgar dê là 6 rbô 500 tơmàn đong (kes priă dà lơgar 2 rbô tơmàn đong, kes priă càr Lâm Đồng 4 rbô 500 tơmàn đong), priă cau geh gơnoar cau tờm bơcri priă 1 rbô 600 tơmàn đong, gam wơl là priă bơh ală priă hòi jà tă pơgồp.

Do là rơndăp broă lơh gơwèt mpồl A bơh Ủy ƀan Ñân zân càr Lâm Đồng là anih lơh broă dà lơgar geh gơnăp gơnoar mờ Cau bơcri priă dan rơndăp broă lơh là Lơh bal bơh Tập đoàn Đèo cả lơh cau ala măt. Tơngai dơ̆ dùl, gùng rơndeh ntoăt mhar do geh bơnàng gùng ơnàng 17 thơk bal mờ 4 bơnàng gùng rơndeh lòt, lơh ală anih tơkơn rơndeh mhar ờ sùm, mờ tŭ tơngai digơlan geh lơh gơs tàm nam 2026. Tơngai dơ̆ 2 rơ̆p bơcri priă lơh sir gơl gùng rơndeh ntoăt mhar, bơnàng gùng ơnàng 22 thơk, geh 4 bơnàng gùng rơndeh lòt mờ 2 bơnàng gùng tơkơn rơndeh mhar sùm, digơlan geh lơh tơnơ̆ nam 2035.

Ồng Lê Quỳnh Mai, Phó Củ tịc Mpồl duh broă Ătbồ kă bro Tập đoàn Đèo Cả pà gĭt, Ủy ƀan Ñân zân càr Lâm Đồng neh jàu ai anih lơh in lòt sền lơh Jơnau yal kơlôi sơnơng gơtùi lơh jăt ngan ngồn mờ broă do gam mhar lơh gơs. Đah gùng lòt, ală anih gùng tam tìp, sơnĕ gùng, gùng brong, gùng tơrgùm làng bol ơm kis...tàm gơl gùng rơndeh ntoăt mhar sền bal neh ring bal. Ồng Lê Quỳnh Mai, đơs: Tàm pơgăp nhai 07 nam do den Tập đoàn Đèo Cả rơ̆p jun tus Ủy ƀan Ñân zân càr Lâm Đồng in jơnau yal kơlôi sơnơng gơtùi lơh jăt ngan ngồn neh lơh sir. Pơn jăt hơ̆, Ủy ƀan Ñân zân càr Lâm Đồng pơyua tus Ƀộ Giao thông Vận tải mờ Mpồl duh broă lùp sền nền wơl ală gah nàng lơh broă lùp sền nền wơl rơndăp broă lơh do. Kung gơn kơnờm là tus tàm nhai 09 nam do rơ̆p lơh sir broă lùp sền nền wơl hơ̆ nàng Ủy ƀan Ñân zân càr Lâm Đồng in ngan ngồn kĭ rơndăp broă lơh mờ lơh broă sơnđờm lơh gùng.

Bal mờ gơl gùng rơndeh ntoăt mhar Tân Phú- Bảo Lộc, Ủy ƀan Ñân zân càr Lâm Đồng kung gam lơh pràn broă lam lơh gơl gùng rơndeh ntoăt mhar tàm tơrbŏ bal là Bảo Lộc- Liang Khàng geh bơta jòng 74 kơi sồ, gùng ơnàng 4 bơnàng gùng rơndeh lòt, mờ kờp jơh priă bơcri lơh digơlan là 19 rbô 521 tơmàn đong. Tàm hơ̆, priă Dà lơgar bơcri là rlau 7 rbô 760 tơmàn đong, ală cau bơcri priă là 11 rbô 760 tơmàn đong, gam wơl là priă tă pơgồp ndai. Ồng Hoàng Việt Lâm, Phó Kwang ătbồ Sở Kế hoạc mờ Đầu tư càr Lâm Đồng pà gĭt, gơl gùng rơndeh ntoăt mhar do kung gam lơh mhar lơh sir ală sră nggal nàng gờñ lam lơh bơcri priă. Ồng Hoàng Việt Lâm, đơs: Krơi mờ rơndăp broă lơh gùng rơndeh ntoăt mhar Tân Phú- Bảo Lộc, rơndăp broă lơh gùng rơndeh ntoăt mhar Bảo Lộc- Liang Khàng là rơndăp broă lơh gơ ơm tàm jơh ală ù tiah càr Lâm Đồng dê. Den tàng bè hơ̆, anih lơh broă geh gơnăp gơnoar là Ủy ƀan Ñân zân càr Lâm Đồng mờ anih lơh broă jơnau ai bơcri priă là Hội đồng Ñân zân càr Lâm Đồng. Tŭ do, rơndăp broă lơh kung gam ơm tàm broă lơh jơnau yal kơlôi sơnơng gơtùi lơh jăt ngan ngồn.

Ală rơndăp broă lơh gùng rơndeh ntoăt mhar Tân Phú- Bảo Lộc mờ Bảo Lộc- Liang Khàng là gơl gùng kwơmàng ngan, tàm tơrbŏ bal, tàm tơrbŏ bal lòt rê kă bro phan bơh càr Lâm Đồng dê mờ ƀòn dờng Hồ Chí Minh bal mờ ală càr tàm tiah đah Jum dà lơgar. Tŭ ală gơl gùng rơndeh ntoăt mhar lơh gơs rơ̆p lơh gơlik geh bơta gơn kơnờm uă ngan dong kờl lơh sa- mpồl bơtiàn bơh càr Lâm Đồng dê mờ ală càr tàm tiah do in bơtàu tơnguh.