VOV4.K’ho- Ồng Võ Văn Thưởng, Duh broă sùm Ƀan Ƀí thư ala măt Ƀộ Cíñ trị pa kĭ ai lơh jăt Kơrnoăt 65 bơh Ƀộ Cíñ trị dê bè broă lơh tàm pơdar kwang bàng. Jăt tàm nùs nhơm broă lơh tàm pơdar kwang bàng là dùl tơngume tàm broă lơh kwang bàng, kơrnoăt 65 geh ai lơh jăt bal mờ jơnau kờñ pơn jăt tai tam gơl pa broă lơh tàm pơdar kwang bàng, pal lơh niam, song dơ pă, loh làng, ờ ndơ̆p mpồn mờ ring bal; ờ lời gơlik geh jơnau ờ niam tàm broă lơh kwang bàng.

Kơrnoăt kung cih loh bơnah, cau, gơnoar broă tàm pơdar, jăt mờ hơ̆ broă tàm pơdar bơh kâp hơđang tus kâp hơđơm, bơh kâp hơđơm tus kâp hơđang, bơh tiah do tus tiah ndai; đah ală anih lơh broă, mpồl lơh broă dùl kâp bal tàm ală anih lơh broă cíñ trị. Cau là ală kwang bàng geh rơndăp lài ăt gơnoar broă đơng lam bồ, ătbồ ală kâp. Kơrnoăt sồr, kâp geh gơnăp gơnoar lơh nền tàm pơdar kwang bàng kong kơnòl đơng lam lơh broă rơndăp lơh tàm pơdar kwang bàng mờ rơndăp, jàu broă lơh gơwèt mờ kwang bàng tơnơ̆ tŭ tàm pơdar; lơh jăt broă rơndăp tăp sèng, broă lơh pal loh làng, song dơ pă, ờ ndơ̆p mpồn, sền swì, jăt sền, bơsong lơh tìs; ătbồ, sền swì, đơs pah nam gơwèt mờ kwang bàng tàm pơdar; sền wơl, tơn jơh broă lơh tàm pơdar kwang bàng.

Cau mblàng Lơ Mu K’Yến