Pơgru Đào Thị Huyền, bơto tàm hìu bơsram kấp 1 Ea Trul, xã Ea Trul, kơnhoàl Krông Bông neh rơlao 24 nam kis mờ broă bơto sră, pơgru pà git, lơh broă tàm tiah kal ke, 75% kơnòm bơsram là oh kòn làng bol kòn cau den tàng nam lơi kung bè hơ̆, tàm bồ nam bơsram pa là ală cau pơgru tàm hìu bơsram sền wơl khà măt tus tơl hìu nàng lam sồr kơnòm bơsram lòt bơsram. “Tàm tơngai kơnòm bơsram lòt bơsram, ală kơnòm bơsram kung mờng ngan ơm ờ lòt bơsam tài bơta tàm hìu gơtìp kal ke, cau mè bèp lòt lơh broă ngài ờ gơtùi atbồ ală kơnòm bơsram den tàng geh tŭ ơm ờ lòt bơsram, den tàng cau pơgru atbồ ơdŭ bơsram tus hờ hìu nàng lam sồr ală kơnòm bơsram lòt bơsram, kơ̆p kờñ ală kơnòm dềt in git sră. Tàm tơngai lòt bơto añ sùm tus hờ hìu nàng lam sồr ală kơnòm bơsram lòt bơsram mờ dŭt ndơl broă lam sồr kơnòm bơsram tus lòt bơsram kung tơriang rơlao”.

Ồng Nguyễn Văn Tiến, Kwang atbồ hìu bơsram kấp 1 Ea Trul, xã Ea Trul, kơnhoàl Krông Bông pà git, nam bơsram do, hìu bơsram geh mờr 650 nă kơnòm bơsram. Hìu bơsram lơh ngan geh 100% kơnòm bơsram geh lòt bơsram tơl. Nàng lơh geh jăt jơnau geh ai, bơdìh mờ broă bơ̆t bơtàu broă rơndăp lơh, bơyai lơh pơrjum cau pơgru atbồ ơdŭ bơsram, tam pà pơgồp bal mờ gơnoar atbồ mpồl lơh broă nàng lam sồr kơnòm bơsram lòt bơsram, bơdìh hơ̆ tai hìu bơsram gam lơh ngan hòi jà ală cau geh nùs nhơm niam dong kờl ală kơnòm bơsram geh rài kis gơtìp kal ke nàng ală kơnòm bơsram do geh tơl bơta nàng iang nùs bơsram sră. Ồng Nguyễn Văn Tiến yal: “Hìu bơsram pơgồp bal mờ gơnoar atbồ ƀòn lơgar, ală mpồl lơh broă nùs nhơm dong kờl ai 50 pang sră măi ơdŭ 4, 500 nơm ào, mpha. Gơwèt mờ Sở Giáo zụk mờ Đào tạo bal mờ Kông ty sră phan hìu bơsram càr Dăk Lăk dong kờl ai 10 nă kơnòm bơsram ơdŭ 1 in tơl sră măi. Bơdìh hơ̆ tai, hìu bơsram neh pơgồp bal mờ mpồl cau mè bèp kơnòm bơsram neh blơi 500 pang sră cih mờ ờ uă gai cih nàng rơcang pà ală kơnòm bơsram in bơh tàm ngai bồ nam bơsram tơn di lah ală kơnòm bơsram lơi ờ hềt geh sră cih, gai cih nàng bơsram tàm nam bơsram 2023-2024”.

Jăt ồng Huỳnh Viết Trung, Kwang atbồ phòng Giáo zụk mờ Đào tạo kơnhoàl Krông Bông yal, tus tŭ do jơh ală hìu bơsram neh rơcang tơl ai nam bơsram pa in. Phan bơna, mpồl cau pơgru neh geh tơl, di pal mờ jơnau kờñ bơto pe kấp pa. Kơnòm bơsram ală kấp tàm kơnhoàl lòt bơsram tơl. Mơya, nàng ală kơnòm bơsram geh lòt bơsram niam, Phòng Giáo zụk mờ Đào tạo kơnhoàl neh tơlik sră nggal đơng lam ală hìu bơsram tus bal pơgồp mờ kấp ủy, gơnoar atbồ tàm ală xã tus bal nàng yal mblàng ai cau mè bèp kơnòm bơsram in sền gròi, ai tơl bơta niam nàng ală kơnòm bơsram in lòt bơsram tơl. Ồng Huỳnh Viết Trung pà git: “Lam sồr kơnòm bơsram lòt bơsram tàm ală tiah kal ke neh geh tơl, gam geh ờ uă kơnòm bơsram tai bol añ kung neh pơgồp bal mờ gơnoar atbồ xã, ală hìu bơsram nàng sền gròi lam lơh. Jăt broă rơndăp lơh là ngai 15 nhai 8 tơn jơh broă rơwah kơnòm bơsram, mơya bol añ kung gam pal tơmù tơngai mờ geh tus ngai 05 nhai 9 ală kơnòm bơsram lơi ờ hềt tus lòt bơsram kung gam pal pơn jăt tai lam sồr nàng ală kơnòm bơsram lòt bơsram, nàng tơl niam broă ală kơnòm bơsram geh lòt bơsram tơl”.

Mờ ală broă lơh ngan bơh gah bơto mờ bơsram kơnhoàl Krông Bông, càr Dăk Lăk dê tàm broă hòi jà kơnòm bơsram lòt bơsram bơh ală ngai sơnrờp tơn là bơta tơngŏ niam ai dùl nam bơsram pa lơh geh cồng nha uă in.