Kờp jơh priă bơcri lơh rơndăp broă lơh do là mờr 22 rbô tơmàn đong. Gùng geh tam pà lơh 3 rơndăp broă lơh bơnah, tàm hơ̆, càr Dăk Lăk là anih lơh rơndăp broă lơh bơnah sồ 3, jòng gơl gùng là 48,5 kơi sồ, priă bơcri là 6 rbô 485 tơmàn đong. Tàm ală kơnhoàl bơh càr Dăk Lăk dê geh rơndăp broă lơh lòt gan, Krông Pach geh khà hìu mờ bă ù uă ngan rlau jơh mờ tus tơngai do, do là tiah bơh sơnrờp lơh sir broă kờp sền, đo was ơm kơ̆p ngui giă sờr ntrờn ai ù lơh rơndăp broă lơh.

Hìu bơnhă ồng Hoàng Trung Thành geh 8 sào ù tam kơphê tàm bơrlŭ bal mờ sầu riêng tàm gùl thôn Tân Sơn, xã Ea Yông. Bă mìr do geh nggùl bă Rơndăp broă lơh gùng rơndeh ntoăt răt Khánh Hoà- Buôn Ma Thuột lòt gan. Ồng yal, kơno yal rlau 4 sào ù mìr hìu bơnhă dê gơ ơm tàm bă ù gơtìp ai ù nàng lơh rơndăp broă lơh den añ jơh nùs ngan, tài bơh do là gùng dà, jơnau sồr bơh Đảng, Dà lơgar dê. Gơl gùng geh lơh gơs rơ̆p pơgồp bơnah jơh nùs bơtàu tơnguh lơh sa- mpồl bơtiàn ai ờ gŏ di mìng kơnhoàl Krông Pach in lơm mờ ai jơh bal càr Dăk Lăk in mờ geh tŭ là ai jơh bal gùt ù tiah Tây Nguyên in tai. Gùl nam 2022, kwang bàng lơh broă gah ù tiah neh tus sơn tơ̆p bơnok, mờ tus tàm dơ̆ mờr tus ngai sa tềp bơhiàn dà lơgar nam 2023 do, den tus đo was, kờp sền mờ lơh sră nggal ù tiah nàng lam lơh ală broă pơn jăt tai tơm priă ai ù. Ồng Hoàng Trung Thành, đơs: Ală kwang bàng kờp sền yal làng bol in, bol añ lam khi lòt tus bă ù gơtìp ai wơl, khi dang che đo sơn tơ̆p bơnok bơh bồ tus lồi tơn, kờp tơl chi nàng tơnơ̆ do tơm. Ală gah pơgồp bal đo was, kờp sền bal mờ hìu bơnhă gŏ dipal den là ring bal.

Tàm thôn Tân Sơn, xã Ea Yông, hìu bơnhă ồng Lê Đình Thiên kung geh 4 sào ù tam kơphê tàm bơrlŭ bal mờ tiêu, gơ ơm tàm bă ù gơtìp ai wơl 1/4 bă ù. Ồng Thiên pà gĭt, gùng dà, jơnau kờñ bơh Đảng mờ Dà lơgar dê den hìu bơnhă sùm lơh jăt. Ồng mìng kơ̆p kờñ là broă lơh jăt broă lơh tơm priă ai ù geh lơh loh làng, song dơ pă, pleh hoàc hươr làng bol in. Ồng Lê Đình Thiên, geh jơnau đơs bè do: Pơnyơu bè tàm thôn den uă anih tŭ do bơh 500 tus 600 tơlak dùl sào, hơ̆ là tài bơh sươn khi dê geh uă sầu riêng; uă tờm tiêu, kơphê priă jền ờ huan geh rlau den 300, 400 tơlak đong dùl sào. Gùng rơndeh ntoăt răt mờ tơm wơl den đơs dipal den là kal ke, mơya làng bol mìng kơ̆p kờñ là ndrờm mờ drà kă bro, halà geh lơyah rlau den kung pal geh bơh 70- 80%, den làng bol bol añ ring nùs ngan bal.

Xã Ea Yông, kơnhoàl Krông Pach, geh 193 bă ù bơh 107 hìu bơnhă mờ dùl hìu jum dê gơ ơm tàm Rơndăp broă lơh gùng rơndeh ntoăt răt Khánh Hoà- Buôn Ma Thuột. Kờp jơh bă ù ai wơl là 250,672 thơk vuông. Ồng Nguyễn Phụng Minh, Củ tịc Ủy ƀan Ñân zân xã Ea Yông pà gĭt, tŭ do neh geh 192 tàm 193 bă ù geh đo was sir, broă lơh kờp sền kung mờr bè lơh sir sơl; mpồl kờp sền kung gam jàu sră pơ àr ai Anih tờm bơtàu tơnguh Bă ù kơnhoàl Krông Pach in nàng lơh ală broă lơh tơm. Ồng Nguyễn Minh Phụng, đơs: Bol añ jàu jơh ală sră pơ àr geh gơrềng ai Anih tờm bă ù kơnhoàl dê in. Bơh hơ̆, dùl mpồl lơh broă bơh Anih do dê rơ̆p ai giă mờ lơh gơs sră pơ àr jàu wơl xã in tŏp loh làng dùl dơ̆, jà làng bol lòt sền. Dilah hìu lơi ờ hềt ring bal dơ̆ dùl, bol añ iăt kơno mờ yal jơnau do tus kơnhoàl in nàng khi in tam gơl, tơnơ̆ hơ̆ tŏp dơ̆ 2. Mờ tŭ tŏp dơ̆ 2 mờ làng bol dờp ờ gŏ geh jơnau đơs lơi tai den ngan ngồn dơ̆ 3 rơ̆p jà làng bol lòt dờp priă.

Rơndăp broă lơh gùng rơndeh ntoăt răt Khánh Hoà- Buôn Ma Thuột kờp jơh jòng mờr 118 kơi sồ, lòt gan 4 kơnhoàl bơh càr Dăk Lăk dê, là: Krông Pach, Krông Bông, Ea Kar mờ M’Drak mờ thị xã Ninh Hoà bơh càr Khánh Hoà dê. Tàm hơ̆, mìng is tàm kơnhoàl Krông Pach geh bơta jòng ngan rlau jơh bal mờ rlau 33 kơi sồ, lòt gan 8 xã, là: Hoà Đông, Ea Knuêc, Ea Yông, Ea Kênh, Hoà Tiến, Tân Tiến, Ea Uy mờ Vụ Bổn. Kờp jơh bă ù gơtìp ai wơl là rlau 200 lồ mờ pơgăp 200 lồ kềng gah gùng lơh gùng bơh rlau 1 rbô hìu bơnhă làng bol mờ bàr pe mpồl cau dê.

Mò Ngô Thị Minh Trinh, Phó Củ tịc Ủy ƀan Ñân zân kơnhoàl Krông Pach, càr Dăk Lăk, kwang bàng tàm Mpồl duh broă tơm priă ai ù kơnhoàl dê yal, tus tŭ do, kơnhoàl neh lơh sir geh mờr 2 rbô sră nggal ù tiah, geh 98% bă ù kờñ pal ai wơl ù lơh gùng; lơh sră cih mat 157 tàm 208 hìu lơh gùng dà broă lơh ntrờn ơm kis pa; rơndăp ai 16,5 lồ ù lơh 3 tiah ntrờn ơm kis pa tàm ală xã: Tân Tiến, Vụ Bổn mờ Ea Knuêc. Jăt mò Trinh yal, nàng pleh gơtìp jơnau “bòl glar kal ke” tàm broă tơm priă ai ù mờ uă rơndăp broă lơh rbô tơmàn đong tàm càr Dăk Lăk gam gơtìp, kơnhoàl rơ̆p lơh jăt broă lơh do dùl bă kơrhia ngan, nền nòn ngan, song dơ pă loh làng ờ ndơ̆p mpồn, gàr niam gơnoar kwơ làng bol dê. Mò Ngô Thị Minh Trinh, đơs: Bol añ kĭ sră pơrgon mờ mpồl bơto pơlam, lam lòt sền tus tơl bă ù mờ ờ gŏ di jăt tơl kơnhoàl ù tiah halà dùl xã bal bè hơ̆ là ai giă. Mờ bơta pơgồp bal kơ̆ kơl jăp bè hơ̆, añ kơlôi là làng bol rơ̆p dùl nùs bal sơl, tài bơh gơ dipal. Ờ gŏ di bol he lơh tài bơh bơta do, bơta ne, jơh tơl nă cau kờñ pal lơh bè lơi nàng gàr niam đah bơta kwơ bơh làng bol dê mờ Dà lơgar dê mờ pal jăt tàm nùs nhơm jăt tàm jơnau cih bơh adat boh lam dê ai gơnoar.

Mờ nùs nhơm jal mhar, jơh nùs song dơ pă tàm broă lơh ai ù lơh gùng ờ mìng tàm kơnhoàl Krông Pach lơm, gơn kơnờm broă lơh gùng do rơ̆p geh sơnđờm lơh di tơngai pơrgon lài mờ ngai 30/06 tus. Ai gùng rơndeh ntoăt răt Khánh Hoà- Buôn Ma Thuột tàm tơrbŏ bal tiah tờm Tây Nguyên mờ tiah đah jum tàm gùl lơgar, tàm tơrbŏ bal “brê” mờ “dà lềng” rơ̆p lơh sir di tơngai neh hơ, ai tơl bơta dong kờl bơtàu tơnguh lơh sa, nhơl chờ, gơhòi gơ jà bơcri priă, drơng jơnau kờñ lòt rê pơndiang phan mhar mờ lơngăp lơngai.