3 nă cau do pa geh kŭp tàm hơ̆, geh: Y Khing Liêng (deh nam 1992, kis tàm xã Hoà Sơn, kơnhoàl Krông Bông); Y Huăl Êban (deh nam 1970, kis tàm ƀòn Mấp, thị trấn Ea Pốc, kơnhoàl Cư̆ Mgar); mờ Nay Dương (deh nam 1968, kis tàm xã Cư̆ Pơng, kơnhoàl Krông Búk). Do là 3 nă cau gam tai tàm 6 nă cau gơtìp Kwang àng càr Dăk Lăk yă mờ tơlik kơrnoăt jòi nàng kŭp bè tìs “Sò tơm iơh bơsăk nàng tam dră mờ gơnoar atbồ làng bol” jăt tàm Bơta 113, Adăt lơh glài kŭp màng dê. Ală cau do neh tus bal tơn tàm dơ̆ sò tơm di tàm hìu lơh broă UɃÑZ bàr xã Ea Tiêu mờ Ea Ktur, kơnhoàl Cư̆ Kuiñ ngai 11 nhai 6 lài do, hơ̆ sồng dô.

Drim ngai òr (21/07), dờp jơnau yal 3 nă cau do dô pồn tàm suơn gơwèt ƀòn Kniết, xã Ea Ktur, kơnhoàl Cư̆ Kuiñ, mpồl Kwang àng càr Dăk Lăk neh bơyai lơh wàng se mờ kŭp geh. Tŭ do mpồl lơh broă geh gơnoar gam bơyai lơh lùp khào ală cau do. Bè hơ̆, tus tŭ do, mpồl lơh broă geh gơnoar càr Dăk Lăk neh kŭp geh jơh 6 nă cau gơtìp jòi nàng kŭp tàm dơ̆ sò tơm di tàm kơnhoàl Cư̆ Kuiñ ngai 11 nhai 6 lơh 9 nă cau chơ̆t mờ 2 nă cau sồt să. Tus tŭ do, anih lơh broă kwang àng neh yă 84 nă cau, tàm hơ̆ geh 75 nă cau bè tìs Sò tơm iơh bơsăk nàng tam dră mờ gơnoar atbồ làng bol; 7 nă cau tìs ờ yal yă cau tìs; 1 nă cau tìs bè pồn cau tìs; 1 nă cau bè tìs lơh, lam cau ndai lik mŭt ha là ơm wơl tàm lơgar Việt Nam mờ di mờ adăt boh lam.