Pal sùm sùm gĭt wă is jrô ơnàng, làm uă, pal pơnđơl pràn lơh ngan is uă ngan rlau jơh nàng lơh jat 6 jơnau Ƀác Hồ bơto.

75 nam lài do, Mpồl Kwang àng làng bol chờ hờp mờ pơn yờ să ngan geh 6 jơnau bơto bơh Củ tịc Hồ Chí Minh dê bè “Gơnoar broă cau kwang àng kăc màng”. Do ngan là ală jơnau bơto pơlam kwơ màng ngan, kwơ ngan, tơl làm bơh Củ tịc Hồ Chí Minh dê bè rài kis, nùs nhơm, bơta khin cha, nùs nhơm tơm bơh bơr, bơta pràn jak, bơta niam tàm broă lơh kờñ pal geh bơh kwang àng kăc màng Việt Nam dê. Lòt gan ală rài, bulah tàm ală dơ̆ tam lơh tơng klàs jơi bơtiàn, tơrgùm dùl dà lơgar lài do halà tàm broă lơh tam gơl pa, bơt bơtàu, bơtàu tơnguh Dà lơgar mờ sền gàr Dà lơgar tŭ do, mpồl Kwang àng làng bol sùm bơsram lơh jat nền jrô ơnàng, làm uă, pơnđơl pràn lơh ngan bơsram mờ lơh jat niam ngan ală jơnau bơto bơh Củ tịc Hồ Chí Minh dờng màng dê. Cau lơh ƀăo Nhị Lê, lài do là Phó Tổng Biên tập Pang ƀăo Cộng sản đơs là: “6 jơnau Củ tịc Hồ Chí Minh bơto Kwang àng làng bol bol he  tàm hơ̆ mìng geh 51 akhar, mơya tàm hơ̆ tơngŏ bơta sền sơnơng bơh Củ tịc Hồ Chí Minh dê gơwèt mpồl lơh broă bol he dê; tơngŏ bơta pin dờn jơh nùs ngan mpồl Kwang àng làng bol mờ gơnoar broă là dùl tàm 2 nơm tê bal mờ mpồl ling klàng làng bol sền gàr Đảng, sền gàr Cíñ phủ, sền gàr làng bol. Tàm hơ̆, bol he gŏ bồ tơngoh bơh Bác Hồ dêneh gơ gơs gùng dà pơlam, neh gơ gơs bơta pràn dờng ngan pơndờm pơnđiang mpồl Kwang àng làng bol bol he rơ hời lòt tàm dơ̆ kăc màng sền gàr mờ bơt bơtàu Dà lơgar xã hội củ nghĩa”.

        Giáo sư- Tiến sĩ ồng Hoàng Chí Bảo, Kwang bàng jak chài kấp dờng, lài do là Ủy viên Hội đồng lý luận Dà lơgar đơs là, Dà lơgar he gam rơ hời mut tàm rài bơtàu tơnguh pràn tơl làm mờ dùl ròt bal broă lơh tam gơl pa, jơh ală broă lơh mờ măy mok jơh lơm, rcang lài mờ lơh ngan mut gơrờm bal mờ dunia tơl làm, jrô ơnàng làm uă, tàm tơngai ală bơta tàm dunia, tàm tiah do kung gam gơlik geh kal ke, gơrềng tus broă lơh gàr niam lơngap lơngai, rơndap tap sèng. Nàng lơh jat kơnòl broă sền gàr Đảng, sền gàr gơnoar atbồ, sền gàr làng bol, gàr niam lơngap lơngai Dà lơgar mờ rơndap tap sèng, lơngap lơngai mpồl bơtiàn, bơceh broă tus bal bơt bơtàu mpồl Kwang àng làng bol ngan ngồn cíñ quy, nhap nhar, pa, den broă gĭt wă uă mờ lơh jat 6 jơnau Bác Hồ bơto Kwang àng làng bol là kwơ màng ngan mờ kờñ pal geh ngan.

Giáo sư- Tiến sĩ ồng Hoàng Chí Bảo, đơs: “6 jơnau bơto bơh Bác Hồ dê neh geh bal bè nùs nhơm, geh bal bè cíñ trị mờ geh bal bè bơta niam chài. Jrô ơnàng rlau tai là bơta niam chài tơm bơh bơr, niam chài lơh broă, bơta niam chài song dơ pă ngan ngồn mờ Bác Hồ đơs là pal tryang tryồng, tềm pềr, song dơ pă ngan ngồn. Tŭ do jơh ală bol he ndrờm pal bơsram tàp bơta niam chài song dơ pă ngan ngồn nàng di pal mờ bơta pin dờn bơh làng bol dê. Hwềng soàn bơh 6 jơnau bơto do dê ngan là jơnau tơm bơh bơr mờ làng bol pal ki ngàm, sền dờng màng mờ làng bol. Tài bơh Kwang àng là gơ̆p bơyô làng bol dê bè Bác Hồ đơs bè hơ̆ tŭ ki ngàm, sền dờng màng mờ làng bol ờ mìng là nùs nhơm tơm bơh bơr dê lơm mờ pal geh đo was mờ broă lơh nàng làng bol in dờn, làng bol kờñ, làng bol dong kờl, làng bol sền gàr den hơ̆ sồng geh kwơ”.

 Nàng pơn jat tai bơtàu tơnguh pràn rlau tai broă bơsram, lơh jat 6 jơnau Bác Hồ bơto, mpồl Kwang àng làng bol, Tổng Ƀí thư ồng Nguyễn Phú Trọng đơs loh jơnau sồr gơwèt mờ gùt mpồl Kwang àng làng bol tàm gùt lơgar dê pal sền gròi bơsram lơh jat, tơrgùm lơh niam 3 broă tờm, hơ̆ là “bơsram”, “ lơh ngan jơh nùs lơh mờ lơh jat”; “ Kơh niam lam lài”. Sơlơ tơnguh broă bơsram, lơh jat 6 jơnau Bác Hồ bơto gơ gơs broă lơh sùm, pah ngai; gơ gơs bơta mờng kuèng tàm rài kis, jơnau kơlôi sơnơng, broă lơh bơh tơl nă kwang bàng, cau ling Kwang àng làng bol dê. Tổng Ƀí thư ồng Nguyễn Phú Trọng sồr: “Tơl nă kwang bàng, cau ling Kwang àng làng bol pal sùm sùm “sền is, lơh niam wơl is, bơto bơsram is, pơlam tàp: pal sùm gĭt wă is jrô ơnàng làm uă mờ kung pal pơnđơl pràn lơh ngan is uă ngan rlau jơh nàng lơh jat 6 jơnau Bác Hồ bơto, kwơ màng là jơnau sồr bơto pơlam “gơwèt mờ să tờm is he dê, pal tryang tryồng, tềm pềr, song dơ pă ngan ngồn” tài bơh do là nùs nhơm tàm broă lơh , là bơta tơm bơh bơr tàm tơl bơta gĭt gơ̆p mờ cau lơi kung tìp bal pah ngai. 6 jơnau Bác Hồ bơto Kwang àng làng bol là jơnau nting tơngkah gơwèt mờ 1 mpồl mùl gŏ ngan, dùl gah broă mùl gŏ krơi is mờ bơta pràn gơrềng tàm mpồl bơtiàn dờng ơnàng ngan, cau lơi kung pal sùm sền is tàm hơ̆’.

Sùm 75 nam do, 6 jơnau bơto bơh Bác Hồ kờñ gơboh dê bè “Gơnoar broă cau Kwang àng kăc mệnh” kung gam bè ờs bơta kwơ , ngan là tàm tơngai tŭ do, tŭ jơh gùt Đảng, gùt làng bol mờ gùt ling klàng gam kràñ cê jơh nùs lơh jat Nghị quyết Dà lơgar dơ̆ 04, khoă XIII bè bơt bơtàu, lơh niam wơl Đảng; bơsram mờ lơh jat nùs nhơm, bồ tơngoh, broă lơh mờ rài kis Hồ Chí Minh dê. Lơh jat niam bơhiàn Cau ling khin cha jak chài pơn rơ ngan, mpồl Kwang àng làng bol pơn jat tai bơsram, lam lơh jat niam 6 jơnau Bác Hồ bơto Kwang àng làng bol, pơlam tàp os, gàr kơ̆ nùs nhơm cíñ trị, nùs nhơm kăc màng, bơt bơtàu rùp hin niam bơnĕ bè cau Kwang àng kăc màng “Tài Dà lơgar hŭi să tờm- Tài làng bol drơng broă”.